Vasif Eyvazzadə: “Gənclərin uğuru təkcə diplomla ölçülməyəcək”
Gənclərin yaradıcılıq potensialı təkcə fərdi istedaddan deyil, həm də güclü və düzgün qurulmuş təhsil sistemindən asılıdır. Bu baxımdan Azərbaycan gənclərinin bacarıqlarını inkişaf etdirməsi və imkanlarını genişləndirməsi üçün təhsil mühitində atılacaq addımlar xüsusi əhəmiyyət kəsb edir.
Məsələ ilə bağlı CCEI – Mədəniyyət və Təhsil İnstitutunun sədri, BilikHub Azərbaycanın qurucusu Vasif Eyvazzadə Xpress.az-a açıqlama verib.
"ABŞ-də təhsil, liderlik və innovasiya mühitini yaxından müşahidə etmiş bir şəxs kimi Azərbaycan gənclərinin yaradıcılıq potensialının çox yüksək olduğu qənaətindəyəm. Əsas məsələ bu potensialın erkən yaşlardan aşkarlanması, inkişaf etdirilməsi və real dəyərə çevrilməsidir",-deyə o bildirib.
Mütəxəssis qeyd edir ki, bu gün süni intellekt, rəqəmsallaşma və texnoloji dəyişikliklər əmək bazarını sürətlə transformasiya edir. Buna görə də təhsil sisteminin məqsədi yalnız bilik ötürmək deyil, həm də düşünməyi, sual verməyi, problem həll etməyi və yeni imkanlar yaratmağı öyrətmək olmalıdır.
"Məktəb və universitetlərdə dizayn düşüncəsi, adaptivlik, təşəbbüskarlıq, sahibkarlıq, innovasiya və süni intellekt savadlılığı daha geniş tətbiq edilməlidir. Gənclər problemləri insan mərkəzli şəkildə təhlil etməyi, yaradıcı həllər hazırlamağı, ideyaları sınaqdan keçirməyi və uğursuzluqlardan öyrənməyi bacarmalıdırlar,"-deyə
Vasif Eyvazzadə qeyd edib.O vurğulayıb ki, gələcəyin uğurlu gənci yalnız diplom sahibi olan deyil, aldığı təhsili və qazandığı təcrübəni iqtisadi, sosial və intellektual dəyərə çevirə bilən şəxs olacaq. Təhsil sadəcə bilik toplamaq prosesi deyil, həmin biliklərdən istifadə edərək yeni həllər, layihələr və təşəbbüslər yaratmaq bacarığıdır.
Onun sözlərinə görə, məhz bu yanaşmadan çıxış edərək CCEI çərçivəsində BilikHub Azərbaycan təşəbbüsü inkişaf etdirilir. Məqsəd gəncləri yalnız diplomla deyil, yaradıcı düşüncə, rəqəmsal bacarıqlar, sahibkarlıq ruhu, liderlik keyfiyyətləri və real layihə təcrübəsi ilə gələcəyə hazırlamaqdır.
Mütəxəssis hesab edir ki, innovasiya, rəqəmsal transformasiya və süni intellekt sahələrinə dövlət səviyyəsində göstərilən diqqət strateji əhəmiyyət daşıyır. İndi əsas vəzifə dövlət, özəl sektor və təhsil müəssisələrinin birgə əməkdaşlığı ilə bu baxışın real nəticələrə çevrilməsidir.
“Azərbaycanın gələcək uğuru məhz düşünən, yaradan, təşəbbüs göstərən və dəyişən dünyaya uyğunlaşa bilən gənclərdən asılı olacaq”, – deyə o bildirib.
Afaq Qurbanzadə
