Məzahir Əfəndiyev: "Bu günün məzunları sabahın güclü Azərbaycanını quracaqlar"

İyunun 13-də 92 saylı Göyçay-Ağdaş seçki dairəsi üzrə Milli Məclisin deputatı Məzahir Əfəndiyev Ağdaş rayonunun Birinci Aral kənd və Göyçay şəhərindəki Rəsul Rza adına 1 saylı tam orta məktəblərinə səfər edərək “Son zəng” günü münasibətilə təşkil olunan tədbirlərdə iştirak edib, bu unudulmaz gündə məzunları, valideynləri və pedaqoji kollektivi səmimi qəlbdən təbrik edib.

Çıxışı zamanı gənclərimizə gələcək həyatlarında müvəffəqiyyətlər arzulayan millət vəkili onların müasir Azərbaycanın lokomotiv qüvvəsi olduğunu qeyd edərək, düzgün vətəndaş mövqeyi nümayiş etdirməklə bundan sonra Vətənimizin, xalqımızın və insanlarımızın rifahı naminə səy və bacarıqlarını əsirgəməyəcəklərinə əminliyini ifadə edib.
M. Əfəndiyev “Son zəng” gününün böyük sevinc hissi ilə qeyd olunduğunu bildirib. O qeyd edib ki, bu gün həm gənclərimizin əldə etdikləri bilik və bacarıqlarla yeni həyat yoluna qədəm qoymasını, valideyn və müəllimlərimizin yaşadıqları qürur kimi əvəzolunmaz hissləri özündə ehtiva edir, eyni zamanda suveren Azərbaycan Respublikasının hər bir şəhər, rayon və kəndində böyük fəxarət hissi ilə qeyd olunur.
Təhsilin əhalinin maariflənməsində, xüsusilə gənclərimizin formalaşmasında rolunu vurğulayan deputat məzunlara yeni çağırışları nəzərə alaraq təhsillərini davam etdirməyi və düzgün peşəyə yiyələnməyi arzulayıb. Bu prosesdə pedaqoji heyətin səy və əzmkarlıq göstərməsinin vacibliyi vurğulanıb.
Tədbirlər məzunların hazırladıqları konsert proqramının nümayişi və xatirə şəklinin çəkdirilməsi ilə başa çatıb.
Tədbirlərdən sonra M. Əfəndiyev təhsil müəssisələrində məktəb binalarının təchizatı və mövcud şəraiti ilə yaxından tanış olub, həmçinin pedaqoji kollektiv tərəfindən məktəb və təhsillə bağlı səsləndirilən təklifləri müzakirə edib.