Davamlı dəri qaşınması xərçəngin ilk əlaməti ola bilər- ONKOLOQ AÇIQLADI
Dəri qaşınması çox vaxt allergiya, dərinin quruluğu, ekzema, psoriaz, qaraciyər və böyrək xəstəlikləri kimi səbəblərlə əlaqələndirilir. Lakin bəzi hallarda bu əlamət bədəndə inkişaf edən onkoloji xəstəliklərin ilk siqnallarından biri ola bilər.
Xpress.az xəbər verir ki, həkim-onkoloq Həmis Maqomedovanın sözlərinə görə, bəzi xərçəng növləri orqanizmdə allergik reaksiyalara bənzər əlamətlər yaradır. Şiş hüceyrələri müəyyən bioloji maddələr və zülallar ifraz edərək qaşınma, səpkilər, qızartılar və həddindən artıq tərləmə kimi simptomlara səbəb ola bilər.
Mütəxəssis bildirib ki, bəzi hallarda bu cür əlamətlər şişin aşkar edilməsindən aylar, hətta illər əvvəl ortaya çıxır. Tibbdə bu vəziyyət "paraneoplastik sindrom" adlanır. Xüsusilə qan, dəri, qaraciyər, öd kisəsi və öd yollarının xərçəngi zamanı belə hallar müşahidə oluna bilər.
Xərçəng zamanı qaşınma niyə yaranır?
Onkoloqun sözlərinə görə, qaşınma müxtəlif mexanizmlərlə meydana çıxa bilər:
Dəri xərçəngi zamanı şiş birbaşa dərini qıcıqlandırır;
Qaraciyər və öd yollarının bəzi şişlərində öd duzlarının dəridə toplanması qaşınmaya səbəb olur;
Şişin sinirlərə təzyiq göstərməsi nəticəsində sinir mənşəli qaşınma yaranır;
Bəzi şişlər histamin ifrazını artıraraq allergiyaya bənzər reaksiyalar törədir.
Bundan əlavə, kimyaterapiya, immunoterapiya, şüa müalicəsi və ağrıkəsici opioid preparatların qəbulu da qaşınmaya səbəb ola bilər.
Onkoloji qaşınmanı necə tanımaq olar?
Mütəxəssislər bildirirlər ki, xərçənglə əlaqəli qaşınmanı digər səbəblərdən yaranan qaşınmadan ayırmaq həmişə asan deyil. Bununla belə, bəzi xarakterik əlamətlər mövcuddur:
Qaşınma heç bir səpki və ya allergik əlamət olmadan yaranır;
Su ilə təmasdan sonra daha da güclənir (akvagen qaşınma);
Baldır nahiyəsində və ya döş qəfəsində daha intensiv hiss olunur;
Yanğı hissi ilə müşayiət olunur;
Dərinin və gözlərin saralması kimi əlavə əlamətlərlə birlikdə meydana çıxır.
Mütəxəssislərin fikrincə, narahatlıq, stress, dərinin quruluğu, susuzlaşma və yüksək temperatur da qaşınmanı daha da gücləndirə bilər.
Həkimə nə vaxt müraciət etmək lazımdır?
Həkimlər səbəbi bilinməyən, uzun müddət davam edən və ya getdikcə güclənən qaşınmanın mütləq araşdırılmalı olduğunu bildirirlər. Belə hallar bəzi xərçəng növlərinin, o cümlədən:
ağciyərin qeyri-kiçik hüceyrəli xərçənginin;
limfomanın;
süd vəzi xərçənginin;
yumurtalıq xərçənginin
erkən əlamətlərindən biri ola bilər.
Mütəxəssislər vurğulayırlar ki, qaşınma təkbaşına xərçəng diaqnozu demək deyil. Lakin səbəbi müəyyən edilməyən və uzun müddət davam edən qaşınma hallarında həkim müayinəsindən keçmək vacibdir.
