Sumqayıt Tibb Mərkəzinin Göz Mərkəzində 6 ayda 10 mindən çox ambulator müraciət qeydə alınıb
Sumqayıt Tibb Mərkəzinin tabeliyində fəaliyyət göstərən 2 nömrəli Şəhər Xəstəxanasının Göz Mərkəzi əhaliyə ixtisaslaşmış oftalmoloji xidmətlərin göstərilməsini davam etdirir.
Göz Mərkəzinin son 6 ay üzrə statistik göstəricilərinə əsasən, bu müddət ərzində 10 688 ambulator müraciət qeydə alınıb. Müxtəlif göz xəstəlikləri ilə bağlı müraciət edən pasiyentlər müvafiq müayinələrdən keçirilib, onların sağlamlıq vəziyyətinə uyğun olaraq zəruri müalicə və tibbi müdaxilələr həyata keçirilib.
Hesabat dövründə Göz Mərkəzində ümumilikdə 1371 cərrahi əməliyyat icra olunub. Əməliyyatlar müxtəlif oftalmoloji patologiyaların aradan qaldırılması və pasiyentlərin görmə funksiyasının yaxşılaşdırılması məqsədilə həyata keçirilib.
Bununla yanaşı, 6 ay ərzində Mərkəzdə 1261 Avastin inyeksiyası icra edilib. Bu prosedur tibbi göstəriş əsasında müvafiq göz xəstəliklərinin müalicəsində tətbiq olunub.
Beləliklə, 6 aylıq dövrdə Göz Mərkəzində ambulator müraciətlərin, cərrahi müdaxilələrin və digər oftalmoloji prosedurların yüksək göstəriciləri qeydə alınıb.
Qeyd edək ki, Sumqayıt Tibb Mərkəzinin 2 nömrəli Şəhər Xəstəxanasının nəzdində fəaliyyət göstərən Göz Mərkəzində oftalmoloji xəstəliklərin müayinəsi, diaqnostikası və müalicəsi istiqamətində xidmətlər göstərilir. Mərkəzin əsas məqsədi müasir tibbi yanaşmalardan istifadə etməklə pasiyentlərin keyfiyyətli və əlçatan oftalmoloji xidmətlərə çıxışını təmin etməkdir.
