Lənkəran Tarix-Diyarşünaslıq Muzeyini ötən il 75 min turist ziyarət edib

Xpress.az xəbər verir ki, Dövlət Turizm Agentliyinin Lənkərana təşkil etdiyi mediatur çərçivəsində jurnalistlərə açıqlama verən muzeyin direktoru Leyla Məmmədova ötən il müəssisəyə 75 min turistin gəldiyini bildirib.
Direktorun sözlərinə görə, xarici qonaqlar muzeyin yerləşdiyi tarixi binaya və sərgilənən eksponatlara böyük maraq göstərirlər: "Əcnəbi ziyarətçilər həm binanın özü, həm də ekspozisiyalarla yaxından maraqlanırlar. Xüsusilə keçmiş məişət əşyaları və tariximizi əks etdirən eksponatlar onların daha çox diqqətini çəkir".
L.Məmmədova əlavə edib ki, ötənilki statistikaya əsasən ziyarətçi sayı 75 min nəfər olub, cari ilin yekun göstəriciləri isə ilin sonunda açıqlanacaq.
Muzeyin eksponat fondu barədə də bilgi verən müəssisə rəhbəri hazırda burada 12 min 500 əşyanın qorunduğunu diqqətə çatdırıb: "Hazırda 6 min eksponat ekspozisiya zalında nümayiş etdirilir. Əvvəllər ümumi sayı 10 min olan eksponatların üzərinə sonradan tərəfimizdən daha 2 min 500 nümunə əlavə edilərək bu göstərici 12 min 500-ə çatdırılıb".