Qışda evi daha isti saxlamağın SADƏ YOLU
Havalar soyumağa, enerji xərcləri artmağa başlayıb… Bəs kombinin istilik dərəcəsini dəyişmədən evi necə daha isti saxlamaq olar?
Kombi ustalarının fikrincə, əsas məsələ kombinin gücündə deyil, istiliyi qorumağı bilməkdədir. Sadə bir üsulla evinizin temperaturunu bir neçə dərəcə artırmaq mümkündür: radiatorların arxasına istiliyi əks etdirən folqa yerləşdirmək!
İstini İtirməyin, Geri Qaytarın
İstilik sistemi üzrə mütəxəssis Pol Bryusterin sözlərinə görə, isinmənin sirri yüksək temperaturda deyil, istiliyin düzgün istiqamətə yönləndirilməsində gizlidir:
“Kombinin istiliyini artırmaq əvəzinə, istiliyin divardan çölə çıxmasının qarşısını alın. Radiatorun arxasına qoyulan sadə bir izolyasiya folqası istiliyi divardan əks etdirərək otağa geri qaytarır.”
Bu üsulla cəmi bir neçə dəqiqəlik tətbiqdən sonra otağın istiliyini 1–2 dərəcə artırmaq mümkündür. Üstəlik, bu metodun xərci demək olar ki, yoxdur — adi alüminium folqa belə işə yarayır.
Bu sadə addımın təsirini artırmaq üçün mütəxəssislər bir neçə əlavə tədbir də məsləhət görür:
• Radiatorların qarşısını bağlamayın: mebel və pərdələr istiliyin otağa yayılmasına mane olur.
• Pəncərə və qapıları izolyasiya edin: kiçik hava sızmaları evin istiliyinin 20%-ni itirə bilər.
• Termal pərdələr və qapı altı izolyasiya lentlərindən istifadə edin: sadə, amma çox effektli üsullardır.
• Günəşdən yararlanın: gündüz pərdələri açıq saxlayın, axşam isə istiliyi içəridə saxlamaq üçün bağlayın.
Bryuster xəbərdarlıq edir ki, radiatorlarda toplanan hava da istilik itkisinə səbəb olur:
“Kombinizin sazlaması düzgün olsa da, radiatorun içində hava qalırsa, su dövranı pozulur. Bu da radiatorun bir hissəsinin isti, digər hissəsinin isə soyuq qalmasına gətirib çıxarır. Hər mövsümün əvvəlində radiatorlardakı havanı çıxarmaq lazımdır.”
Radiatordakı havanı boşaltmaq cəmi bir neçə dəqiqə çəkir, lakin təsiri günlərlə hiss olunur.
Kombi ustalarının fikrincə, düzgün izolyasiya və ağıllı istifadə, həm enerji sərfiyyatını azaldır, həm də evdə komfortu artırır:
“Evi isti edən kombi deyil, düzgün istilik idarəsidir. Kiçik tədbirlərlə həm pulunuza, həm də rahatlığınıza qənaət edə bilərsiniz.”
Qısası: bu qışda hesablarınız artmadan evinizi isti saxlamaq istəyirsinizsə, radiatorun arxasına sadə bir folqa yerləşdirmək kifayətdir.
