Bu ərazidə vəhşi pişiklərin sayı rekord həddə çatıb
Kipr adasında vəhşi pişiklərin sayı son illərdə rekord səviyyəyə çatıb. Yerli hakimiyyət orqanlarının məlumatına görə, hazırda adada hər milyon sakinə bir milyondan çox pişik düşür.
Xpress.az xəbər verir ki, bu barədə oktyabrın 14-də “The Independent” nəşri məlumat yayıb.
Kiprin Ətraf Mühit üzrə Komissarı Antonia Theodosiou bildirib ki, hazırda mövcud olan sterilizasiya proqramı artan pişik populyasiyasının qarşısını almaqda yetərsiz qalır. Proqram çərçivəsində hər il cəmi 100 min avro vəsait ayrılır və bu büdcə ilə təxminən 2000 sterilizasiya proseduru həyata keçirilir.
"Bu, yaxşı bir proqramdır, lakin mütləq genişləndirilməlidir", – deyə Theodosiou qeyd edib. O əlavə edib ki, əgər pişiklərin say artımı bu tempdə davam edərsə, vəziyyət nəzarətdən çıxa bilər.
Ekoloji fəallar pişiklərin faktiki sayının rəsmi statistikadan xeyli çox – yüz minlərlə ola biləcəyini bildirirlər. Onlar dövlət orqanlarını maliyyəni artırmağa və yerli ekosistemləri qorumaq məqsədilə məcburi sterilizasiya tədbirlərini tətbiq etməyə çağırırlar.
Bu arada, Rusiyada qanunvericilər insanların mənzillərdə saxladıqları pişik və itlərin sayının məhdudlaşdırılması təklifi ilə çıxış ediblər. Təşəbbüs müəllifləri hesab edir ki, bu addım sanitar riskləri azaldacaq və qonşular üçün yaranan narahatlıqları aradan qaldıracaq. Lakin bəzi hüquqşünaslar bu təşəbbüsü ədalətsiz və həddən artıq formalist adlandıraraq tənqid ediblər.
