Hacı Zeynalabdin Tağıyevin nəticəsi: “Nənəm atasını çox sevirdi, bütün həyatını ona həsr etmişdi”
Hacı Zeynalabdin Tağıyevin nəticəsi, polkovnik-leytenant Dmitri Sarayev nənəsi Sara xanım haqqında xatirələrini bölüşüb. O, bildirib ki, nənəsi atasına – məşhur xeyriyyəçi Hacı Zeynalabdin Tağıyevə – dərin sevgi və hörmət bəsləyib:
“Nənəm atasını çox sevirdi. Bütün həyatını atasına həsr etmişdi. Həmişə bizə atasından danışırdı. Deyirdi ki, atası öz millətini həddindən artıq çox sevirdi,” – deyə Dmitri Sarayev bildirib.
Sarayev qeyd edib ki, bir vaxtlar nənəsinin atasına dair xatirələrini maqnitofona yazıb:
“Dostumun bir maqnitofonu vardı. Nənəmin yanına gələndə ona çoxlu suallar verib, səsini kasetə yazırdım. Amma o kaset indi itib. Atam kiməsə vermişdi, indi tapa bilmirəm. O kasetdə nənəmin çoxlu dəyərli fikirləri vardı. İndi isə məndə nənəmin babama yazdığı məktublar qalıb.”
Məlumata görə, Hacı Zeynalabdin Tağıyevin qızı Sara xanımın oğulları Oleq və Lev Nikolayeviç Sarayev sonradan Rusiyaya köçüblər. Dmitri Sarayev isə Lev Sarayevin oğludur.
O, uzun illər Bakıda nənəsi Sara xanımın yanında yaşayıb, daha sonra Rusiyaya köçərək hüquq-mühafizə orqanlarında xidmət edib. Dmitri Sarayev polkovnik rütbəsində təqaüdə çıxıb.
