Maldiv adaları dünyada siqareti qadağan edən ilk ölkə oldu
Maldiv adaları dünyada siqaretə tam qadağa tətbiq edən ilk ölkə olub. Yeni qanuna əsasən, 2025-ci il noyabrın 1-dən etibarən 2007-ci il yanvarın 1-dən sonra doğulan şəxslərə tütün məhsullarını almaq, istifadə etmək və ya əldə etmək qadağandır.
Qadağa bütün növ tütün məmulatlarını əhatə edir. Pərakəndə satış məntəqələri alıcıların yaşını təsdiqləmək üçün şəxsiyyət vəsiqəsi tələb etməyə borcludur.
Qanun turistlərə də şamil olunur. Bundan başqa, yaşından asılı olmayaraq elektron siqaretlər və veyplər ölkədə tam qadağan edilib. Qaydaları pozan şəxslər üçün inzibati cərimələr nəzərdə tutulub.
Qeyd olunur ki, oxşar təşəbbüslə Yeni Zelandiya da çıxış etmişdi. Lakin 2024-cü ilin iyulunda qüvvəyə minməsi planlaşdırılan qanun 2023-cü ilin noyabrında yeni hökumət tərəfindən vergi endirimlərini maliyyələşdirmək məqsədilə ləğv edilib.
