Uşaqlara sosial media qadağası – Danimarkadan sərt addım!

Xpress.az xarici KİV-ə istinadən xəbər verir ki, Danimarka hökuməti 15 yaşdan aşağı uşaqların sosial media platformalarından istifadəsini qadağan edib. Qərarın məqsədi uşaqları və yeniyetmələri rəqəmsal dünyanın psixoloji və sosial mənfi təsirlərindən qorumaqdır.

Danimarka Rəqəmsal İşlər Nazirliyinin təşəbbüsü ilə irəli sürülən təklif hökumət və siyasi partiyalar tərəfindən təsdiqlənib. Yeni qaydalara əsasən, sosial mediadan istifadə üçün minimal yaş həddi 15 yaş olaraq müəyyən edilib.

Nazirliyin açıqlamasında qeyd olunub: “15 yaşdan kiçik uşaqlar özlərini zərərli məzmuna məruz qoya biləcək platformalara daxil ola bilməməlidirlər.”

Bununla belə, valideyn razılığı olduğu halda, 13 yaşdan yuxarı uşaqlara sosial media hesabı açmağa icazə veriləcək.

Yeni qərarın uşaqların fərdi inkişafına və sosial bacarıqlarının formalaşmasına müsbət təsir göstərəcəyi vurğulanıb. Qaydaların icrasına nəzarət məqsədilə xüsusi “rəqəmsal nəzarətçilər” fəaliyyət göstərəcək və monitorinq tədbirləri gücləndiriləcək.

Qeyd edək ki, daha əvvəl Avstraliya da 16 yaşdan aşağı şəxslərin sosial media hesabı yaratmasını məhdudlaşdıran oxşar qərar qəbul etmişdi.