Trampın Ukrayna Planı Cenevrədə Gərginlik Yaradır – Aİ və ABŞ Arasında Narazılıq Dərinləşir

Xpress.az xəbər verir ki, Avropa İttifaqı, ABŞ və Ukrayna nümayəndələrinin Donald Trampın hazırladığı Ukrayna üzrə sülh planını noyabrın 23-də Cenevrədə müzakirə edəcəyi barədə məlumatlar xarici KİV tərəfindən təsdiqlənib. Almaniyanın DPA agentliyi hökumət dairələrinə istinadən bildirib ki, planın məzmunu Avropada ciddi narahatlıq doğurur.
The Guardian yazır ki, Aİ liderləri ABŞ ordusunun rəsmisi Den Driskoll ilə görüşdə planın bir sıra maddələrinə etiraz edərək sənədin yenidən işlənməsini tələb ediblər. Onlar həmçinin Vaşinqtonu müttəfiqlərin iştirakı olmadan gizli danışıqlar aparmaqda günahlandırıblar.

Financial Times isə görüşün “xoşagəlməz atmosferdə” keçdiyini bildirir. Nəşrin mənbələrinə görə, Driskoll Avropa nümayəndələrinə Vaşinqtonun bu məsələdə xüsusi güzəştə getməyəcəyini açıq şəkildə bildirib.

Ukrayna Prezidenti Volodimir Zelenskiy ABŞ-dan sülh planının ilkin variantını aldığını təsdiqləyib və sənədin diplomatik proseslərin aktivləşməsinə təkan verə biləcəyini qeyd edib. Planın 28 bənddən ibarət olduğu deyilir. Bununla yanaşı, Avropada sənədlə bağlı həm də təhlükəsizliklə bağlı narahatlıqlar səsləndirilir.
ABŞ administrasiyası bildirir ki, plan hazırlanarkən Ukraynanın və Avropa tərəfdaşlarının mövqeyi nəzərə alınacaq. Rusiya Prezidenti Vladimir Putin isə yeni təşəbbüsü müsbət qiymətləndirərək sülhə doğru addım sayıla biləcəyini deyib.