Dima Bilana AĞIR İTKİ
Media meneceri Marina Ermoşkina bildirib ki, onun həyat yoldaşı və biznes partnyoru, 37 yaşlı Eduard Bark dünən gecə yuxuda ürək tutmasından dünyasını dəyişib. Cütlük yaxınlarda birlikdə AllStars Music agentliyini təsis etmiş və artıq ilk böyük uğurlarını əldə edərək Dima Bilanla müqavilə imzalamışdı.
Eduardın həmkarları onun ölümü ilə bağlı yayılan açıqlamada böyük itki yaşadıqlarını bildiriblər:
“Eduard Sergeyeviç 37 yaşında ürək tutmasından yuxuda dünyasını dəyişdi. O, ləyaqətli, mehriban, inanılmaz dərəcədə güclü, parlaq və nəcib insan idi. Peşəkarlığın, cəsarətli ideyaların və insan birliyinin nümunəsi olan media holdinqi yaratmağa və ona rəhbərlik etməyə nail oldu. Onun enerjisi və əzmkar əməyi hər birimizi ilhamlandırırdı.”
Hadisədən şoka düşən Marina Ermoşkina sevgilisinin ölümündən sonra onun haqqında ağır kədər içində danışıb. O bildirib ki, onlar çox yaxın günlərdə özləri üçün yeni həyat mərhələsindən, gələcək planlarından və işlərindəki uğurlardan bəhs edirdilər.
“Mən heç vaxt sevincimi bu qədər səmimi bölüşən bir kişi görməmişdim. Sanki sehrlə ətrafımda nağıl yaradırdın. Mən sevinəndə sən daha çox sevinirdin, mənim uşaqlıq arzularımı gerçəyə çevirirdin,” — deyə bloqer yazıb.
Marina sevgilisinin qəfil itkisini qəbul etməkdə çətinlik çəkdiyini qeyd edib. Dünən onların sevgi və gələcək planlar haqqında danışdıqlarını, bu gün isə hər şeyin bir anda yox olduğunu vurğulayıb.
“Tez-tez mənə unikal olduğumu və mənim kimi birini heç vaxt görmədiyini söyləyirdin. Bu sözlər mənə böyük güc verirdi. Son iki ayda yaşadığımız çətinliklər və bəzi insanların mənfi təsirləri səni çox yormuşdu. Hər şeyin bir anda necə dağıldığına inanmaq çətindir.”
Sonda o, Eduardın həyatındakı yerinə görə minnətdarlığını ifadə edib:
“Sən mənim üçün çox şey etdin, məni daha yaxşı insan etdin. Heç vaxt istədiyim bir şeyə ‘yox’ demədin. Ürəyimdə yalnız sevgi və minnətdarlıq var. Səni tanıdığım üçün xoşbəxtəm. Elə bilirəm ki, hələ də buradasan və bizi izləyirsən".
Xpress.az
