Şrekə bənzəyən real insan: Moris Tiyənin inanılmaz hekayəsi+ FOTO
Cizgi filminin yaranmasından çox əvvəl – 1903-cü ildə Fransada qeyri-adi görünüşə sahib bir insan dünyaya gəlib. Moris Tiyə yetkinlik illərində akromeqaliya adlı nadir xəstəliyə tutulub. Bu xəstəlik kəllə sümüklərinin, əllərin və ayaqların həddindən artıq böyüməsinə səbəb olur. Otuz yaşına çatanda onun siması demək olar ki, “nəhəng” görünüş almışdı.
Ancaq Moris insanlardan gizlənməyi seçməyib. O, arenaya çıxaraq “Fransız mələyi” ləqəbi ilə peşəkar resler olub və ABŞ-da böyük məşhurluq qazanıb. Gücü, xarizması və qeyri-adi görünüşü onu dövrünün ən tanınan idmançılarından birinə çevirib.
Onilliklər sonra DreamWorks studiyasının Şrek obrazını yaratdığı zaman məlum olub ki, məşhur qəhrəmanın vizual xüsusiyyətləri müəyyən dərəcədə Moris Tiyənin xarici görünüşündən ilhamlanıb: iri çənə, özünəməxsus sifət cizgiləri, kobud, amma mehriban xarakter.
Beləliklə, milyonların sevdiyi animasiya qəhrəmanının arxasında real həyatda yaşamış və qeyri-adi taleyi ilə iz qoymuş bir insan dayanır.
