Hakerlərdən yeni üsul: Toy dəvətnaməsinə kliklədi telefonunun idarəsini itirdi
Hindistanda dələduzlar WhatsApp vasitəsilə göndərdikləri saxta dəvətnamə linkləri ilə insanların telefonlarını ələ keçirir və bank hesablarından pul çıxarırlar.
Hindistanda toy mövsümünün başlaması ilə birlikdə kiberdələduzlar WhatsApp üzərindən göndərilən saxta rəqəmsal toy dəvətnamələri ilə vətəndaşları hədəf alan yeni bir üsuldan istifadə edir.
Yerli media xəbərlərinə görə, dələduzlar WhatsApp vasitəsilə göndərdikləri bu saxta dəvətnamə linkləri ilə insanların telefonlarına tam nəzarəti ələ keçirir və bank hesablarından pul çıxarırlar.
Zee News-da yer alan bir hadisəyə görə, Bijnorun Dhampur bölgəsində yaşayan Dr. Omprakash Chauhan WhatsApp-ına gələn toy dəvətnaməsi linkinə kliklədikdən saniyələr sonra 31 min rupi itirib.
Dr. Chauhanın şikayətinə əsasən, linkə toxunduğu anda telefonunun üzərindəki bütün nəzarəti itirib.
Eyni anda bank hesabından 31 min rupi çıxılıb və bütün şəxsi məlumatları “Cyber Thakur” adlı hesaba ötürülüb.
Dələduzluğa məruz qaldığını anlayan Chauhan həm yerli polis bölməsinə, həm də Bijnor Kiber Cinayətlər Şöbəsinə müraciət edib. Hadisə ilə bağlı araşdırma davam edir.
Kibertəhlükəsizlik mütəxəssislərinə görə, dələduzlar saxta rəqəmsal toy dəvətnamələrini adətən APK (Android Package Kit) faylı şəklində göndərirlər.
Bu fayllar telefona yükləndikdə bir tətbiq kimi işləyərək zərərli proqramı avtomatik aktivləşdirir. Zərərli proqram quraşdırıldığı anda dələduzlara istifadəçinin telefonuna tam giriş imkanı verir — bank tətbiqləri, UPI ödəniş sistemləri, parollar və bütün şəxsi məlumatlar əlçatan olur.
Dələduzluğun ən təhlükəli tərəflərindən biri isə öz-özünə yayıla bilməsidir. Telefon ələ keçirildikdə eyni saxta toy dəvətnaməsi linki avtomatik olaraq zərərçəkənin bütün telefon kitabçasına göndərilir. Beləliklə, hücum zəncirvari şəkildə genişlənir.
Ardıcıl yaşanan oxşar hadisələrdən sonra polis vətəndaşları diqqətli olmağa çağırıb. Bijnor şəhər polis rəisi müavini Dr. Krishna Gopal, naməlum nömrələrdən gələn linklərin, faylların və ya rəqəmsal toy dəvətnamələrinin açılmaması gərəkdiyini bildirib.
Xüsusilə WhatsApp üzərindən göndərilən APK fayllarının qətiyyən endirilməməsi lazım olduğunu vurğulayıb.
Gopal həmçinin heç bir halda bir dəfəlik şifrələrin başqaları ilə paylaşılmaması gərəkdiyini deyib.
