"Ədəbiyyata maraq yox səviyyəsindədir"- Yazıçılar Birliyindən GİLEY

Azərbaycan ədəbiyyatı minilliklər boyu şifahi xalq yaradıcılığından başlayaraq Nizami və Füzuli kimi klassiklərin əsərləri ilə zənginləşmiş, XIX–XX əsrlərdə isə maarifçilik və modern ədəbi cərəyanlarla yenilənmişdir. Müstəqillik dövrü isə ədəbiyyata sərbəst yaradıcılıq, yeni üslub və düşüncə gətirərək onun inkişafını davam etdirmişdir.

Əvvəllər Azərbaycan xalqı mütaliəyə və ədəbiyyata böyük maraq göstərirdi. Bir neçə il öncə istər ictimai yerlərdə, istərsə də gündəlik həyatda hər kəsin əlində qəzet, jurnal və ya kitab görmək mümkündü. Lakin bu gün bu vərdiş demək olar ki, yox səviyyəsinə düşüb.

Azərbaycan Yazıçılar Birliyinin sədri Anar Rzayev Xpress.az-a açıqlamasında vəziyyəti belə izah edib:

“Ədəbiyyata marağın azalmasının səbəbi eyni zamanda mütaliəyə olan marağın azalmasıdır. İnsanlar artıq hər şeyi telefondan oxuyurlar. Telefondan oxunan material isə nə ədəbiyyat ola bilər, nə də onun dərinliyini və zövqünü verə bilər.

Xəbərlərə gəlincə, insanlar bütün xəbərləri sosial şəbəkələrdən oxuyur və yalanla gerçək xəbəri ayırd etməkdə çətinlik çəkirlər. Buna görə də ədəbiyyata maraq bütün dünyada azalıb".

Afaq Qurbanzadə 

Xpress.az