GİZLİ TƏHLÜKƏ: Bəzi insanlar sizi yavaş-yavaş xəstələndirir!

“Energetik vampir” termini mistik anlam daşımır. Bu ifadə, ünsiyyət zamanı qarşı tərəfin enerjisini, emosional balansını və motivasiyasını aşağı salan insanları təsvir edir. Mütəxəssislərin fikrincə, belə şəxslərlə uzunmüddətli təmas həm psixoloji, həm də fiziki sağlamlığa mənfi təsir göstərə bilər.

Energetik vampirlər adətən davamlı şikayət edən, tənqid edən, günahkarlıq hissi yaradan və qarşısındakının vaxtını, emosiyalarını nəzərə almayan insanlardır. Onlarla söhbətdən sonra insan özünü yorğun, ağır və motivasiyasız hiss edir. Zaman keçdikcə bu vəziyyət stressi artırır və sağlamlıq problemlərinə yol açır.

Psixoloqlar bildirir ki, xroniki stress hormonlarının yüksəlməsi baş ağrısı, yuxusuzluq, halsızlıq və hətta yüksək təzyiqə səbəb ola bilər. Uzunmüddətli emosional yük immun sistemini zəiflədir və orqanizmi xəstəliklərə daha həssas edir. Həmçinin, davamlı neqativlik və narahatlıq psixosomatik xəstəliklərin, mədə-bağırsaq problemlərinin, ürək-damar xəstəliklərinin, depressiya və tükənmişlik sindromunun yaranmasına zəmin yaradır.

Bəzən heç bir konkret xəstəlik olmadan yorğunluq, baş ağrısı və ruh düşkünlüyü hiss edirik. Diqqət yetirdikdə görürük ki, bu hallar müəyyən insanlarla təmasdan sonra yaranır. Bu şəxslər “energetik vampirlər” adlanır.

Xpress.az-ın araşdırmasına görə, uzmanlar belə hallardan qorunmaq üçün sərhəd qoymağı, ünsiyyət vaxtını məhdudlaşdırmağı, emosional məsafə saxlamağı, neqativ mövzuları dəyişdirməyi və psixoloji enerjini bərpa etməyi tövsiyə edir. Lazım gələrsə, toksik münasibətlərdən tamamilə uzaqlaşmaq ən sağlam seçimdir.

Uzmanlar bildirir ki, energetik vampirlərdən qorunmaq yalnız emosional rahatlıq üçün deyil, həm də fiziki sağlamlığın qorunması üçün vacibdir.

Xpress.az