Bu məşhur televiziya kanalı 30 illik loqosunu dəyişdirir
ABŞ mərkəzli CNBC maliyyə kanalı, 30 ildən sonra ikonik loqo dizaynını dəyişdirmək qərarına gəlib. Təxminən üç onillikdir istifadə olunan tovuzquşu simvolu ləğv edilir və kanal yeni brend kimliyinə keçid edir. Yenidən brendləşmə prosesi 13 dekabr 2025, şənbə səhərindən etibarən rəsmi şəkildə başlayacaq.
Yeni loqo ilk dəfə 4 dekabr 2025-də keçirilən Versant İnvestor Günü tədbirində təqdim olunub. CNBC-nin prezidenti KC Sullivan investorlar üçün çıxışında belə deyib:
“Bu dəyişiklik, irəlilədiyimiz istiqamətin və daxil olduğumuz həyəcanverici yeni dövrün simvoludur.”
Sullivan bildirib ki, CNBC hər zamankindən daha güclü və qlobal səviyyədə əvəzolunmaz bir brendə çevrilib.
ORİJİNAL LOQOYA İSTİNAD
Yeni dizayn CNBC-nin maliyyə sahəsindəki ekspertliyini ön plana çıxararkən 1989-cu ildəki ilk loqoya da istinad edir. Loqonun mərkəzindəki “N” hərfi kanalın keçmişi ilə bu günü arasında bir bağ yaradır. Simgədəki yuxarı yönlü ox isə həm kanalın qrafik dilinin bir parçası, həm də maliyyə bazarlarında yüksəlişi təmsil edən bir işarə kimi seçilir.
Ox simvolunun CNBC-nin 2023-cü il yayım dizaynında istifadə olunan “parçalanmış kvadrat hərəkəti” konsepsiyasının davamı olduğu qeyd edilir. Dizaynerlər bildirir ki, ox həmçinin köhnə NBC tovuzquşu ilə vizual əlaqə yaradır və sanki geridə qoyulmuş bir tükü xatırladır.
BİR ÇOX SAHƏDƏ DƏYİŞİKLİK GÖZLƏNİR
13 dekabrda həyata keçiriləcək transformasiya ilə CNBC-nin proqram açılışlarından tutmuş studiya dekorasiyasına, qrafik paketlərdən animasiyalara qədər bir çox sahədə yeniləmələr aparacağı gözlənilir. NBC tovuzquşuna edilən bütün vizual göndərmələr, animasiyalar və effektlər aradan qaldırılacaq. Kanal artıq 5 dekabrdan etibarən yeni brend kimliyini tanıdan xüsusi promo seriyasına start verib.
