Kişilərə qapalı kənd: Dünyada yalnız qadınların yaşadığı SİRLİ KƏND
Afrikanın Keniya ərazisində yerləşən Umoja kəndi dünyada yalnız qadınların yaşadığı yeganə yaşayış məntəqəsi kimi tanınır. Kişilərin daimi yaşamasının qadağan olunduğu bu kənd 1990-cı ildə Samburu xalqından olan zorakılığa məruz qalmış qadınlar tərəfindən yaradılıb.
Xpress.az xəbər verir ki, kənd sakinlərinin bildirdiyinə görə, britaniyalı əsgərlər tərəfindən zorlanmadan sonra bir çox qadınlar ailələri tərəfindən evdən qovulub, bəzi hallarda isə “zorlanmış qadın ərini biabır edir” düşüncəsi ilə həyatlarına qəsd edilib. Umoja bu qadınlar üçün təhlükəsiz sığınacaq və yeni həyatın başlanğıcı olub.
Umojanın yaranmasına səbəb olan digər mühüm amil Samburu cəmiyyətində qadınların ağır asılı vəziyyətdə yaşamasıdır. Bu toplumda qadın sünnəti, məcburi nikahlar (yalnız ağsaqqalların evlənmək hüququnun olması), zorakılıq və döyülmə geniş yayılıb. Ərini itirən qadınlar isə ailə tərəfindən qovula bilir, çünki onlar cəmiyyət üçün “itki mənbəyi” hesab olunur.
Pul toplayan kənd sakinləri yaşadıqları torpağı rəsmi şəkildə satın alaraq müstəqil icma qurublar. Bu gün Umoja kəndində bütün uşaqlar məktəbə gedir, qadınlar isə oxumaq-yazmaq və digər əsas bacarıqları öyrənmək üçün təhsil almaq imkanı əldə ediblər.
Kəndin əsas gəlir mənbəyi rəngarəng muncuq bəzəklərinin hazırlanaraq Samburu qoruğuna gedən yol kənarında satılmasıdır. Bundan əlavə, qadınlar satış üçün yerli zəif spirtli pivə analoqu da hazırlayırlar. Bu fəaliyyətlər onlara yaşayışlarını təmin edəcək qədər gəlir qazandırır.
Görünüş baxımından Umoja Samburu xalqının ənənəvi kəndlərindən seçilmir: daxmalar torpaq və inək peyininin qarışığından tikilir, evlərin ətrafı isə tikanlı kollardan hazırlanmış hasarlarla qorunur.
Hazırda Umoja kəndində təxminən 300 nəfər yaşayır. Kişilərin kənddə daimi yaşamasına icazə verilməsə də, kişi turistlər üçün qadağa yoxdur. Kəndə giriş haqqı 20 ABŞ dollarıdır.
Umoja bu gün qadınların zorakılığa qarşı birliyinin, müstəqilliyinin və ləyaqətli həyat uğrunda mübarizəsinin simvolu hesab olunur.
