Dünyanın ən çox “öpülən” qadını: Parisli Senanın sirli hekayəsi

1930-cu illərdə Parisdə Sena çayının sahilində kimliyi məlum olmayan gənc bir qızın cəsədi tapılıb. Aparılan araşdırmalar nəticəsində onun 16–17 yaşlarında olduğu və intihar etdiyi müəyyən edilib. Qızın şəxsiyyəti isə heç vaxt məlum olmayıb.
Morqda çalışan həkim bu sirli gənc qızın üz ifadəsindən dərin şəkildə təsirlənərək arı mumundan onun üz qəlibini hazırlayıb. Sonradan “Sena” adı verilən qız Parisdə kimsəsizlər qəbiristanlığında dəfn edilib.
Həkimin evində saxladığı üz qəlibi qonaqların diqqətini çəkib. Qızın üzündəki qəribə sakitlik, rahatlıq və itirilmiş xoşbəxtliyi xatırladan ifadə Parisdə qısa zamanda məşhurlaşıb və dildən-dilə yayılıb.
Bu hekayədən ilhamlanan norveçli oyuncaq istehsalçısı Asmund Laerdal 1940-cı ildə Senanın üzünü kopyalayaraq onu oyuncaq istehsalında istifadə edib. “Annie” adlandırılan bu kukla qısa müddətdə Avropada ilin ən çox satılan oyuncaqlarından birinə çevrilib.
1958-ci ildə amerikalı həkim Peter Safar ağızdan-ağıza süni tənəffüs üsulunu təqdim etdikdən sonra bu texnikanı öyrətmək məqsədilə insan ölçüsündə 500 ədəd maneken sifariş edib. Lakin ABŞ hökuməti bu təşəbbüsü lazımsız hesab edərək sifarişi qəbul etməyib. Nəticədə Laerdal həmin manekenləri Norveçə göndərib.
Sonrakı illərdə süni tənəffüs və ürək-ağciyər reanimasiyası (CPR) təlimlərində bütün dünyada eyni üzə sahib manekenlərdən istifadə olunmağa başlanılıb. Bu manekenlərin hamısı Parisli Senanın üz cizgilərini daşıyır.
Beləliklə, bir zamanlar Sena çayında həyatına son verdiyi düşünülən naməlum gənc qızın üzündəki təbəssüm bu günə qədər milyonlarla insanın həyatını xilas edən “öpücüyə” çevrilib. Parisli Senanın sirli vida anı, tibbin və insanlığın simvoluna çevrilərək tarixdə öz yerini tutub.

Xpress.az