Sara Əzimova yazır: "Sərhəddə təhqir, məktəbə hücum-nankor molla rejiminin əsl siması Naxçıvanlılara yaxşı tanışdır"
Naxçıvan Muxtar Respublikasının Əməkdar jurnalisti Sara Əzimova İranla bağlı son hadisələr fonunda şəxsi xatirələrinə və müşahidələrinə əsaslanan yazı ilə çıxış edib.
Xpress.az xəbər verir ki, o, illər boyu naxçıvanlıların İran sərhədində üzləşdiyi münasibətin təsadüfi olmadığını bildirib.
Sara Əzimova qeyd edir ki, Naxçıvan uzun illər blokada şəraitində yaşadığı üçün insanlar Bakıya getmək və ya sadə ticarət məqsədilə İran ərazisindən keçməyə məcbur qalırdı. Onun sözlərinə görə, həmin dövrlərdə sərhəd keçid məntəqələrində azərbaycanlılara qarşı tez-tez kobud və təhqiramiz münasibət sərgilənirdi.
Sözügedən yazını təqdim edirik:
"Biz naxçıvanlılar olaraq nankor molla rejimin mahiyyətini uzaqdan deyil, illər boyu öz həyatımızda hiss etmişik. Naxçıvan uzun illər blokada şəraitində yaşadığı üçün Bakıya getmək, yaxud sadə ticarət üçün belə İran ərazisindən keçməyə məcbur qalırdıq. Uşaqlıqdan yaddaşıma həkk olunan bir mənzərə var: sərhəd keçid məntəqələrində azərbaycanlılara qarşı kobud davranış, səbəbsiz qışqırıqlar, təhqiramiz münasibət…
Elə hallar olurdu ki, heç bir səbəb olmadan insanları saatlarla gömrükdə saxlayırdılar. Bir dəfə viza vurulması üçün növbədə bir nəfərin sıranı pozmasını bəhanə edərək qoca, uşaq demədən hamını saatlarla gözlətdilər. Yanımda körpə uşaq vardı. Su istədik. Onu belə vermədilər. Şüşəli otaqlardan bizə nifrət dolu baxışlarla baxıb gülürdülər.
Bu, sadəcə bir sərhəd proseduru idi? Xeyr... Bu, açıq şəkildə hiss olunan mənəvi təzyiq idi. Biz naxçıvanlılar bu münasibətin təsadüfi olmadığını çox yaxşı anlayırdıq. Uzun illər ərzində sərhəddə, gömrükdə, müxtəlif məqamlarda azərbaycanlılara qarşı eyni münasibətin təkrarlanması artıq bir sistemin göstəricisi idi.
Bu gün isə həmin rejimin əsl siması bir daha üzə çıxdı. Naxçıvanda dərs vaxtı, uşaqlar məktəbdə olarkən tədris müəssisəsinin vurulması artıq bütün sərhədləri aşan bir vəhşilikdir. Mülki infrastrukturun, xüsusilə də məktəbin hədəfə alınması heç bir şəkildə izah oluna bilməz.
ABŞ və Avropa İttifaqının müxtəlif strukturları, hərbi missiyaları Ermənistanda yerləşdiyi halda, İranın hədəfi Azərbaycanın mülki infrastrukturu və məktəbdə dərs oxuyan uşaqlar olur.
Bu hadisə molla rejiminin əsl mahiyyətini bir daha ortaya qoyur. Uşaqların həyatını təhlükə altına atan belə addımlar bu rejimin nə qədər təhlükəli və məsuliyyətsiz olduğunu göstərir.
Tarix isə belə hadisələri heç vaxt unutmur".
Xpress.az
