Tramp Rusiya və Çinə meydan oxuyur - BU ŞƏKİLDƏ
Donald Trampın beynəlxalq siyasətdəki addımları Rusiya və Çin üçün birbaşa çağırış kimi qiymətləndirilə bilər. Bu fikri Xarici və Müdafiə Siyasəti Şurasının üzvü Aleksandr Nosoviç URA.RU-ya müsahibəsində səsləndirib.
Ekspertin sözlərinə görə, Vaşinqton digər ölkələrin liderlərinin suverenliyinə məhəl qoymadan onların taleyi ilə bağlı qərarları birtərəfli şəkildə qəbul etməyə hazır olduğunu nümayiş etdirir.
Nosoviç hesab edir ki, Tramp ABŞ-ın müttəfiqi olmayan ölkələrə açıq mesaj verir. Onun fikrincə, bu çağırış ilk növbədə Rusiya və Çinə yönəlib və həmin dövlətlərdən Avropadakı NATO üzv ölkələri kimi ABŞ-ın siyasi xəttinə uyğun davranmaları gözlənilir.
Politoloq vurğulayıb ki, ABŞ yalnız öz gücünə arxalanaraq hərəkət edir və Vaşinqton beynəlxalq münasibətlərdə öz qaydalarını diktə etməyə çalışır.
Ekspertin fikrincə, bu vəziyyət beynəlxalq hüquq və diplomatik normaların artıq ABŞ-ın təsir dairəsindən kənarda qalan ölkələr üçün əvvəlki kimi təhlükəsizlik zəmanəti vermədiyini göstərir.
Bu açıqlamalar regionda artan gərginlik fonunda səsləndirilib. Yaxın Şərqdə vəziyyət xüsusilə İran ətrafında baş verən hadisələrdən sonra daha da mürəkkəbləşib. Münaqişə nəticəsində regionda təhlükəsizlik riski artıb, Tehran isə cavab tədbiri kimi Hörmüz boğazında gəmiçiliyi məhdudlaşdırmaqla hədələyib ki, bu da qlobal iqtisadiyyat üçün ciddi risklər yaradır.
Xpress.az
