Yer kürəsi "atəş" altında: Martın 19-da nə baş verəcək?

Martın 19-da Yer kürəsində son iki ayın ən güclü geomaqnit qasırğası gözlənilir.

Rusiyanın Günəş Astronomiyası Laboratoriyasının verdiyi məlumata görə, planetimiz G2-G3 səviyyəli güclü plazma dalğasının təsirinə məruz qalacaq.

Buna səbəb martın 16-da Günəşdə birbaşa Yer istiqamətində baş vermiş "M" sinfinə aid güclü partlayışdır. Alimlər bildirirlər ki, partlayışın məhz planetimizlə üzbəüz nöqtədə baş verməsi onun təsir gücünü qat-qat artırır.

Mütəxəssislər xəbərdarlıq edirlər ki, G3 səviyyəli (güclü) qasırğa zamanı enerji şəbəkələrində gərginlik artımı və qəzalar, peyk naviqasiyasında, radiokomunikasiyada və internetdə fasilələr, orbitdəki peyklərin işində texniki nasazlıqlar, dünyanın bir çox nöqtəsində qütb parıltılarının (şimal işıqları) müşahidə edilməsi kimi hallar yarana bilər.

Bundan əlavə, Günəşdə yeni "tac dəliklərinin" yaranması geomaqnit vəziyyəti daha da gərginləşdirə bilər.

Qeyd edək ki, belə hallarda adətən meteohəssas insanlara diqqətli olmaq, fiziki yükü azaltmaq və bol maye qəbul etmək tövsiyə olunur.