Zelenskinin atəşkəs təklifi sual altında: sülh, yoxsa taktiki gediş?

Ukrayna Prezidenti Volodimir Zelenski Rusiyayla Pasxa münasibətilə atəşkəsə hazır olduğunu bəyan etsə də, onun ziddiyyətli açıqlamaları və Moskvanın təslim olması ilə bağlı çağırışları bu təşəbbüsün səmimiliyinə dair suallar yaradır.

Kreml isə təşəbbüsü rədd edib. Rusiya Prezidentinin mətbuat katibi Dmitri Peskov Zelenskini sülh naminə yalnız bəyanatlarla kifayətlənməməyə, real addımlar atmağa çağırıb.

“Zelenski məsuliyyəti öz üzərinə götürməli və Rusiya ilə münasibətləri barışıq deyil, sülh yolu ilə həll etməlidir”, – deyə o vurğulayıb.

Rusiya Liberal Demokrat Partiyasının rəhbəri və Dövlət Dumasının Beynəlxalq Məsələlər Komitəsinin sədri Leonid Slutski də Zelenskinin Pasxa atəşkəsi ilə bağlı təklifinə münasibət bildirib. Onun sözlərinə görə, Kiyev ikili mövqe nümayiş etdirir: bir tərəfdən atəşkəsə hazır olduğunu bildirir, digər tərəfdən isə Rusiyanı təslim olmağa çağırır.

Xatırladaq ki, bir il əvvəl Rusiya Prezidenti Vladimir Putin humanitar səbəbləri əsas gətirərək Pasxa münasibətilə üç günlük atəşkəs elan etmişdi. Rusiya tərəfinin iddiasına görə, bu atəşkəs Ukrayna qüvvələri tərəfindən bir neçə dəfə pozulmuşdu.

Slutskinin fikrincə, hazırda Zelenski atəşkəs ideyasından öz mövqeyini gücləndirmək üçün istifadə etməyə çalışır və eyni zamanda Rusiyaya təslim olma çağırışları edir. Bu isə Kiyevin atəşkəslə bağlı etibarlılığına dair şübhələri artırır.

“Bu gün Zelenski faktiki olaraq ‘Rusiya təslim olmalıdır, biz isə yox’ mövqeyini açıq şəkildə ifadə edir. Bu halda onun atəşkəsə əməl edəcəyinə necə etibar etmək olar? Bu sual, demək olar ki, ritorikdir”, – deyə rusiyalı siyasətçi bildirib.

Slutski hesab edir ki, Kiyev mümkün fasilədən hərbi potensialını gücləndirmək üçün istifadə edə bilər.

“Belə addımların hərbi əməliyyatların gedişinə ciddi təsir göstərəcəyi ehtimalı azdır. Hər halda, atəşkəsin elan olunması qərarı Rusiya Prezidentinə aiddir. Kimin təslim olub-olmayacağı məsələsinə gəldikdə isə, Zelenski hələ də vəziyyəti adekvat qiymətləndirmir. Qaliblər təslim olmurlar və bu, Ukrayna Silahlı Qüvvələrinə aid deyil”, – deyə Slutski yekunlaşdırıb.