“İldə bir dəfə səhnəyə çıxıb maaş alanlar var”

“Son zamanlar teatrımız haqqında xoşagəlməz və həqiqətə uyğun olmayan söhbətlər yayılır. Bu deyilənlərin böyük əksəriyyəti, demək olar ki, 90 faizi əsassızdır”.

Bu sözləri Xpress.az-a açıqlamasında tanınmış opera ifaçısı, Azərbaycan Dövlət Akademik Opera və Balet Teatrının solisti, Prezident mükafatçısı Taleh Yəhyayev bildirib.

Onun sözlərinə görə, işə gəlməyən əməkdaşların maaşlarının kəsilməsi ilə bağlı səsləndirilən iddialar həqiqəti əks etdirmir:

“İddia olunur ki, guya işə gəlməyən əməkdaşların maaşlarının kəsilməsi qanunsuzdur. Halbuki bu, tamamilə qanuna uyğundur. Dövlət müəssisəsində çalışan hər bir işçi müəyyən müddət işə çıxmadıqda ya intizam məsuliyyətinə cəlb olunur, ya da əməkhaqqından həmin günlər tutulur. Bu qayda hamıya aiddir. Mənim də işə gəlmədiyim günlər olub və qanuna uyğun şəkildə həmin günlərin əməkhaqqı kəsilib. Bu, normal və ədalətli yanaşmadır”.

T.Yəhyayev bildirib ki, bəzi şəxslər illərlə səhnədən uzaq qalsalar da, əməkhaqqı almaqda davam edirlər:

“Açıq demək lazımdır ki, işə gəlmək hər bir əməkdaşın borcudur. Təəssüf ki, elə insanlar var ki, illərlə teatr səhnəsində çıxış etmirlər, ölkədən kənarda yaşayırlar və Azərbaycana nadir hallarda gəlirlər. Buna baxmayaraq, aylarla maaş alırlar. Bəziləri ildə cəmi bir dəfə səhnəyə çıxır və o çıxış da çox vaxt peşəkar səviyyədə olmur”.

O, bəzi solistlərin özlərini xaricdə Azərbaycanı təmsil edən sənətçilər kimi təqdim etməsinə də münasibət bildirib:

“Bəzən özlərini ‘dünyaca məşhur’ kimi təqdim edərək guya Azərbaycanı xaricdə təmsil etdiklərini deyirlər. Lakin indiyədək onların afişalarında Azərbaycanın adına rast gəlməmişik. Əgər doğrudan da ölkəni təmsil edirlərsə, bunu konkret faktlarla sübut etsinlər. Reallıq isə ondan ibarətdir ki, bəziləri illərdir şəxsi maraqları üçün xaricdə yaşayır, müxtəlif fəaliyyətlərlə məşğul olur, lakin özlərini teatrın aparıcı simaları kimi təqdim edirlər”.

Solistin sözlərinə görə, bu şəxslərin əksəriyyəti rəsmi olaraq teatrı təmsil etmir:

“Onların əksəriyyəti nə ‘Opera və Balet Teatrının solisti’ kimi çıxış edir, nə də adlarının yanında Azərbaycan qeyd olunur. Buna baxmayaraq, ilboyu maaş alırlar”.

T.Yəhyayev teatr rəhbərliyi ilə bağlı səsləndirilən iddialara da toxunub:

“Direktor haqqında yayılan bəzi iddialar da həqiqətə uyğun deyil. Guya rəhbərlik əməkhaqqını mənimsəyir kimi fikirlər səsləndirilir. Mən bunu səmimi şəkildə deyirəm ki, bu cür iddialar əsassızdır. Əksinə, rəhbərlik tərəfindən ehtiyacı olan əməkdaşlara, qazi ailələrinə və maddi çətinlik yaşayan texniki işçilərə dəfələrlə şəxsi dəstək göstərilib”.

O, teatrın direktoru Yusif Eyvazov barədə deyilənlərə də aydınlıq gətirib:

“Yusif Eyvazov dünya səhnələrində çıxış edən sənətkardır və qazandığı qonorarlardan ehtiyacı olan insanlara kömək etdiyini də bilirik. Maaşların kəsilməsi ilə bağlı qərarların ona aid edilməsi düzgün deyil. Həmin dövrdə o, ümumiyyətlə ölkədə olmayıb”.

Sonda sənətçi bildirib ki, teatrın əsas yükünü daşıyanlar səhnədə mütəmadi çıxış edən solistlərdir:

“Reallıq isə budur ki, bəzi solistlər əsas rolları ildə cəmi bir-iki dəfə ifa edir. Tamaşalara maraq az olur, bəzən biletlər belə satılmır. Lakin eyni şəxslər yenə də fəxri adlarına arxalanaraq özlərini yüksək səviyyədə təqdim edir.

Əslində isə teatrın əsas yükünü daşıyanlar səhnədə mütəmadi çıxış edən solistlərdir. Məsələn, mən və mənim kimi sənətçilər ildə 30–40 dəfə səhnəyə çıxırıq. Təkcə tamaşalarda deyil, teatrın konsert proqramlarında da müntəzəm iştirak edirik. Biz ayda bir neçə dəfə çıxış etdiyimiz halda, bəzi solistlər ildə cəmi bir dəfə səhnəyə çıxır.

Bu səbəbdən məsələlərə emosiyalarla deyil, faktlarla yanaşmaq və hər kəsin əməyinə ədalətli qiymət vermək vacibdir”.