ABŞ Hörmüz boğazında əməliyyat üçün 15 min hərbçi cəlb edəcək

ABŞ Silahlı Qüvvələrinin Mərkəzi Komandanlığı (CENTCOM) Hörmüz boğazında gəmiçiliyin bərpası məqsədilə hazırlanmış “Azadlıq” əməliyyatının miqyasını açıqlayıb. Hərbi qurumun bəyanatına görə, missiyaya idarə olunan raket silahları ilə təchiz edilmiş esmineslər, 100-dən çox quru və dəniz bazalı aviasiya vasitəsi, çoxdomenli pilotsuz platformalar və 15 min hərbçi cəlb olunacaq.

Əməliyyata ABŞ Dövlət Departamenti və CENTCOM rəhbərlik edir və bu, Dənizdə Gəmiçilik Azadlığı Koalisiyası (MFC) çərçivəsində həyata keçiriləcək. ABŞ prezidenti Donald Tramp əməliyyatı bir gün əvvəl elan edib və onun bazar ertəsi səhər başlanacağı bildirilir.

İran isə cavab olaraq bildirib ki, ABŞ-ın hər hansı müdaxiləsi atəşkəs rejiminin pozulması kimi qiymətləndiriləcək. Trampın Tehranın sülh planını qəbul etməməsindən sonra boğazda gəmiçilik demək olar ki, tam dayanıb və bu, dünyanın əksər ölkələrində yanacaq və sənaye məhsullarının qiymətlərinin artmasına səbəb olub.

Bundan əvvəl İran ABŞ-a üç mərhələdən ibarət uzunmüddətli nizamlanma planı təqdim etmişdi, lakin Vaşinqton bunu tez bir zamanda rədd etmişdi. Plan 30 gün ərzində müharibənin tam dayandırılmasını, İranın müttəfiqləri və İsrailin iştirakı ilə hücum etməmək razılaşmasını, həmçinin liman blokadasının aradan qaldırılmasını və Hörmüz boğazının minalardan təmizlənməsini nəzərdə tuturdu.

 Xpress.az