Angelina Jolie məhkəmədə qalib gəldi- ABŞ-dan köçür

Angelina Jolie, Brad Pitt-ə qarşı məhkəmə iddiasında qalib gəlib və ABŞ-dan Fransaya köçmək qərarına gəlib.
50 yaşlı Hollivud aktrisası keçmiş həyat yoldaşına qarşı davam edən hüquqi çəkişmədə mühüm qələbə qazanıb və bundan sonra həyatında yeni mərhələyə başlamaq qərarı verib.
Məlumata görə, Angelina Jolie və Brad Pitt Fransadakı Şato Miraval üzərində məhkəmə çəkişməsi aparırlar. Los-Anceles Ali Məhkəməsi aktyorun vəsatətini rədd edərək Jolie-nin lehinə qərar çıxarıb.
Hakim bildirib ki, Pitt keçmiş həyat yoldaşını şərab zavodundakı payın satışı ilə bağlı şəxsi e-poçtları təqdim etməyə məcbur edə bilməz. Bu yazışmalar məxfi hesab edilib. Məhkəmə Pittin arqumentlərini kifayət qədər əsaslandırılmamış sayıb, lakin onun gələcəkdə məsələni yenidən qaldıra biləcəyi qeyd olunub.
Aktrisanın vəkili qərarı “əhəmiyyətli qələbə” adlandıraraq bildirib ki, Pitt məxfi sənədlərə çıxış əldə etmək cəhdində həddi aşıb.
Bu arada, Angelina Jolie-nin Kaliforniyadakı evini 30 milyon dollara satışa çıxardığı bildirilir. O, bu evi 2017-ci ildə ayrılıqdan sonra almışdı. İndi isə aktrisa uşaqları ilə birlikdə ABŞ-dan köçərək Fransada yaşamağı planlaşdırır.