İran ABŞ-ın münaqişədə məğlub olduğunu iddia etdi
Xpress.az xəbər verir ki, İran İslam Respublikası Ordusunun sözçüsü Məhəmməd Əkrəminiya İRNA agentliyinə müsahibəsində bildirib ki, ABŞ İrana qarşı həyata keçirdiyi əməliyyatlarda qarşıya qoyduğu məqsədlərə nail ola bilməyib və nəticədə uğursuzluğa düçar olub.
Əkrəminiyanın sözlərinə görə, “Əgər vəziyyəti qiymətləndirsək, görərik ki, qarşı tərəf əvvəlcədən müəyyən etdiyi heç bir məqsədə çata bilməyib və bu münaqişədə məğlub olub”.
O həmçinin vurğulayıb ki, ABŞ-ın regiondakı fəaliyyəti İran daxilində birlik və həmrəyliyi daha da gücləndirib.
Məlumata görə, ABŞ və İsrail fevralın 28-də İrana qarşı hərbi əməliyyatlara başlayıb. Aprelin 7-də ABŞ prezidenti Donald Tramp İranla iki həftəlik qarşılıqlı atəşkəs elan edib. Daha sonra, aprelin 11-də Tehran və Vaşinqton arasında İslamabadda danışıqlar keçirilsə də, tərəflər bir sıra fikir ayrılıqlarına görə uzunmüddətli razılıq əldə edə bilməyiblər.
Aprelin 21-də Donald Tramp atəşkəs rejiminin uzadılmasının mümkün olduğunu açıqlayıb. Bununla belə, İran dövlət televiziyası Tehranın Vaşinqtonun birtərəfli atəşkəs təşəbbüsünü qəbul etmədiyini və öz maraqları çərçivəsində hərəkət edəcəyini bildirib.
