Qırğızıstandakı gölün dibində böyük itirilmiş şəhər tapıldı

Qırğızıstandakı İssık-Kul gölünün dibində arxeoloqlar küçələr, binalar və müsəlman qəbiristanlığı aşkar ediblər. Alimlərin ehtimalına görə, güclü zəlzələ XV əsrin əvvəlində İpək Yolu üzərində yerləşən orta əsr şəhərini su altında qoyub.

Qaynarinfo xəbər verir ki, bu barədə "Ecoticias” nəşri məlumat yayıb.

Sualtı arxeoloqlar gölün şimal-qərb dayaz hissəsində aşkar edilən divarlar, dağıdılmış tikililər, taxta tirlər, dəyirman daşı və böyük müsəlman qəbiristanlığını xəritələyiblər. Tapıntılar İpək Yolu ilə bağlı canlı ticarət mərkəzinin mövcudluğuna işarə edir.

Ekspedisiya Toru-Ayqır adlı su altında qalmış kompleksə fokuslanıb və burada qədim yaşayış məntəqəsinin dörd ayrı sahəsi sənədləşdirilib. Birinci sahədə bişmiş kərpicdən divarlar, dağıdılmış tikililər və ilk baxışda sadə görünən, lakin mühüm ipucu sayılan dəyirman daşı aşkar edilib. Bu tapıntı icma səviyyəsində qida istehsalının mövcud olduğunu göstərir.

Komanda həmçinin dekorativ memarlıq elementinə də rast gəlib. Alimlər onun ictimai binaya, ehtimal ki, məscid, hamam və ya mədrəsəyə aid ola biləcəyini bildirirlər.

İkinci sahədə böyük müsəlman qəbiristanlığı aşkar edilib. Qalıqların İslam dəfn ənənələrinə uyğun olaraq, üzlərinin Məkkəyə yönəldilməsi ilə dəfn edildiyi müəyyən olunub. Tədqiqatçılar daha sonrakı analizlər üçün bir kişi və bir qadının skelet qalıqlarını çıxarıblar.

İnsan qalıqları orta əsr yaşayış məntəqəsində insanların qidalanması, mənşəyi və gündəlik həyatı barədə məlumatların əldə edilməsinə kömək edə bilər. Bundan əlavə, tikililərin dəqiq tarixini müəyyənləşdirmək üçün taxta tirlər də laborator analizə göndərilib.

Alimlərin ilkin qənaətinə görə, Toru-Ayqır kompleksi vaxtilə İpək Yolu üzərində ticarətin çiçəkləndiyi böyük bir şəhər olub.