Zelenski Lukaşenkoya bir həftə vaxt verdi

Ukrayna Prezidenti Volodimir Zelenski bəyan edib ki, Belarus ərazisində Rusiyanın Ukraynaya qarşı pilotsuz uçuş aparatları ilə hücumlarını koordinasiya edən retranslyatorların fəaliyyəti dayandırılmasa, bir həftə sonra Ukrayna bu məsələni özü həll edəcək.

Xpress.az "Unian"a istinadən xəbər verir ki, Zelenski bu barədə mətbuat konfransında danışıb.

“Lukaşenko Belarusun rəhbəridir, Belarus isə bizim qonşu ölkəmizdir. Sərhəddə təhlükəsizlik bizim üçün çox vacibdir. O, çox yaxşı başa düşür ki, biz artıq böyümüş adamlarıq. Heç kim sadəcə sözlərə görə incimir. Amma söhbət mənim ölkəmin təhqir olunmasından gedirsə, biz buna etiraz edəcəyik və bunu unutmayacağıq”, – deyə Ukrayna lideri bildirib.

Zelenski Aleksandr Lukaşenkonun Belarusun müharibəyə cəlb olunmasını istəmədiyi barədə bəyanatlarına skeptik yanaşdığını vurğulayıb.

“Bu məsələdə o, heç olmasa öz xalqına qarşı dürüst olmalıdır. Çünki müharibəyə onun özü deyil, ölkəsi Rusiyanın vasitəsilə cəlb oluna bilər. Onlar müharibənin ilk günlərindən məhz belə davranırlar”, – deyə Zelenski bildirib.

Ukrayna Prezidenti qeyd edib ki, genişmiqyaslı müharibənin başlanğıcında Ukraynaya atılan bir çox raket məhz Belarus ərazisindən buraxılıb.

Onun sözlərinə görə, Lukaşenkonun vəziyyətə nəzarət etmədiyi, bütün qərarların Rusiya tərəfindən qəbul edildiyi barədə açıqlamalarına inanmır.

Zelenski hesab edir ki, Rusiya bundan sonra da Lukaşenkonu müharibəyə daha fəal şəkildə cəlb etməyə çalışacaq, lakin Ukrayna buna cavab verəcək.

“Artıq əlavə sözlərə ehtiyac yoxdur. Onun qüllələrində retranslyatorlar yerləşdirilib. Onların Rusiya və ya Belarus mənşəli olmasının bizim üçün fərqi yoxdur. Ukrayna ilə həmsərhəd iki vilayət boyunca Ukrayna əhalisinə qarşı atəşi koordinasiya edən avadanlıqlar yerləşdirilib”, – deyə Zelenski vurğulayıb.