İsrail danışıqları pozmaq üçün fürsət gözləyir - Fidan
ABŞ və İran 60 gün ərzində bir neçə çətin məsələni həll etməlidirlər, burada çıxılmaz vəziyyətlərin yaranması mümkündür və İsrail danışıqlar prosesini pozmaq üçün fürsət gözləyir.
Bunu Türkiyənin xarici işlər naziri Hakan Fidan qeyd edib.
"Danışıqlar bu gün effektiv şəkildə başlayıb və ilkin əlaqələr qurulub. ABŞ Prezidentinin xüsusi elçisi Stiv Uitkoffla telefonla danışdıq və bu məsələni də müzakirə etdik. Bütün detalları və texniki aspektləri dərhal həll etmək asan olmaya bilər. Zaman-zaman gərginlik yarana bilər. Biz buna hazır olmalıyıq. Əlbəttə ki, ilk fürsətdə vəziyyəti pozmaq üçün uyğun anı gözləyən İsrail həmişə var", - deyə o əlavə edib.
O xatırladıb ki, ABŞ və İran arasında memorandum imzalandıqdan sonra bəzi məsələlər növbəti 60 gün ərzində müzakirəyə çıxarılıb:
"Bəzi məqamlar texniki məsələlərlə, xüsusən də nüvə proqramı ilə bağlı məsələlərlə bağlıdır. Danışıq qrupları sanksiya məsələləri ilə yanaşı, bunlar üzərində də işləməlidir. Münaqişəsiz həll mexanizmi yaradılmalıdır. Bütün bunlar müəyyən dərəcədə texniki məsələlərdir".
