Tarixi irsimizə qarşı VANDALİZM - FOTO + VİDEO

Müasir Ermənistan tarixi Azərbaycan torpaqları üzərində imperialist qüvvələr tərəfindən süni şəkildə qurulmuş dövlətdir. Buna görə də Ermənistanda dövlət səviyyəsində xalqımıza aid tarixi abidələrə, milli-mədəni irsə qarşı böyük vandalizmlər, cinayətlər törədilir. İstər sovet Ermənistanı dövründə, istərsə də ondan sonrakı illərdə ən müxtəlif bəhanələrlə tarixi-memarlıq abidələri məhv edilib, onun xarici görünüşündə dəyişikliklər edilməklə tarixi saxtakarlıqlara əl atılıb. Təəssüf ki, indi də bu siyasət davam etdirilir. Ermənilər Qərbi Azərbaycan ərazisində xalqımıza aid izləri hər vasitə ilə silməyə çalışır, tarixi irsimizə qarşı vandalizm törədirlər.

Xpress.az xəbər verir ki, Qərbi Azərbaycan İcmasının Barana Rayon İcmasının sədri Osman Hacıyev bu barədə daha bir faktı sosial media hesabında paylaşıb. Bildirib ki, 1900-cü ildə Ləmbəli kəndində Qaracalar tərəfindən tikilmiş tarixi yaşayış binası Ermənistan rəhbərliyinin göstərişi ilə 1960-cı illərdə sökülüb: “Bu ev 1900-cü ildə Qərbi Azərbaycanın Barana rayonunun Ləmbəli kəndində Mürşüdlü tayfasının bir qolu olan Qaracalar tərəfindən tikilmişdir. Bu ev həmin illərdə Mürşüdlü tayfası tərəfindən tikilən bundan da böyük dörd binadan biridir. Bizim ailə bir müddət bu evdə yaşayıb. Mən bu evdə anadan olmuşam. Evin ikinci mərtəbəsini sovet hökuməti kənar kəndlərdən gəlib Ləmbəli məktəbində oxuyan şagirdlər üçün yataqxana etmişdi. Ermənilər 1960-cı illərdə plana düşməsi bəhanəsi ilə ailəmizi oradan köçürərək binanı sökdülər. İkinci şəkil sökülmə zamanı çəkilib”.

Günay ATİLLA