V Milli Yaylaq Festivalında baş verən hadisə ilə bağlı RƏSMİ AÇIQLAMA

V Milli Yaylaq Festivalı zamanı baş vermiş hadisə ilə bağlı festivalın təşkilatçıları rəsmi açıqlama yayıblar.
Xpress.az xəbər verir ki, açıqlamada bəzi sayt və KİV-lərdə yayılan "səhnənin aşması" barədə məlumatların həqiqəti əks etdirmədiyi bildirilib.

Qeyd olunub ki, festivalın əsas səhnəsi tədbir boyunca fasiləsiz fəaliyyət göstərib, ikinci günün konsert proqramı isə saat 22:00-dək uğurla davam edib.

Məlumata görə, hadisə əsas səhnədə deyil, cıdır meydanının yaxınlığında yerləşən, atlar üçün nəzərdə tutulmuş samanın saxlanılması məqsədilə qurulmuş yüngül taxta konstruksiyalı, qarğı örtüklü çardaqda baş verib. Həmin çardaq insanların istifadəsi üçün nəzərdə tutulmayıb, masa və oturacaqlarla təchiz edilməyib, həmçinin burada hər hansı xidmət təşkil olunmayıb.

Təşkilat Komitəsi bildirib ki, hadisənin başvermə səbəbləri müvafiq qurumlar tərəfindən araşdırılır və yekun nəticələr araşdırmiş məlumatların çatdırma başa çatdıqdan sonra ictimaiyyətə təqdim ediləcək.

Açıqlamada baş vermiş hadisədən dərin təəssüf hissi ifadə olunub, yüngül xəsarət alan vətəndaşlara tezliklə şəfa arzulanıb.

Bununla yanaşı, media qurumları və informasiya resurslarına müraciət edilərək dəqiqləşdirilməmiş məlumatların yayılmaması, ictimaiyyətə yalnız rəsmi və təsdiqlənmiş məlumatların çatdırılması xahiş olunub.

Sonda vurğulanıb ki, xalqımızın zəngin mədəni irsini, yaylaq həyatını, qədim elat ənənələrini və milli-mənəvi dəyərlərini yaşadan V Milli Yaylaq Festivalı iki gün ərzində on minlərlə ziyarətçini qəbul edərək yüksək təşkilatçılıq şəraitində uğurla keçirilib.