Tramp İrana xəbərdarlıq etdi: Razılaşma olmasa…
Tramp İrana xəbərdarlıq etdi: Razılaşma olmasa, Pikaks dağı məhv ediləcək
ABŞ Prezidenti Donald Tramp Vaşinqtonla Tehran arasında razılaşma əldə olunmayacağı təqdirdə, İranın Pikaks (Kolanq) dağında yerləşdiyi iddia edilən nüvə obyektinin məhv ediləcəyini bildirib.
Tramp bu barədə "Fox News" telekanalına müsahibəsində danışıb.
"Əgər razılaşma əldə olunmasa, Pikaksı məhv etməli olacağıq", – deyə ABŞ prezidenti bildirib.
Donald Tramp xatırladıb ki, iyulun 21-də ABŞ-nin Pikaks dağı ətrafına zərbə endirmək niyyətində olduğunu açıqlamışdı. O, bu bəyanatı İranın nüvə sentrifuqalarını həmin əraziyə köçürdüyünə dair mediada yayılan məlumatlara münasibət olaraq səsləndirib.
ABŞ lideri daha əvvəl də İranın Vaşinqtonla razılaşma əldə etmək istədiyini, lakin hələlik buna hazır olmadığını bildirmişdi.
Qeyd edək ki, İran tərəfi nüvə sentrifuqalarının Pikaks dağına köçürülməsi ilə bağlı yayılan məlumatları rəsmi şəkildə təsdiqləməyib.
