Zelenski: “Biz müharibəni dayandırmaq istəyirik, amma Putin istəmir”
Ukrayna Prezidenti Volodimir Zelenski bəyan edib ki, Ukrayna, ABŞ Prezidenti Donald Tramp və Avropa ölkələri müharibənin başa çatmasını istəyirlər, lakin Rusiya Prezidenti Vladimir Putin buna razı deyil.
Zelenski bu fikirləri Fox News telekanalına müsahibəsində səsləndirib.
O bildirib ki, Kiyev atəşkəsin elan edilməsində israrlıdır və bunun yekun sülh razılaşmasına yol aça biləcəyini hesab edir. Zelenskinin sözlərinə görə, Putin isə hər hansı dialoqda maraqlı deyil. O əlavə edib ki, Putinlə sonuncu dəfə 2020-ci ildə danışıb.
“Biz hər gün müharibənin dayandırılmasını, heç olmasa müəyyən müddətə atəşkəs elan edilməsini və diplomatlara danışıqlar aparmaq imkanı verilməsini xahiş edirik. Amma Putin bunu istəmir. Problem də məhz bundadır”, – deyə Zelenski vurğulayıb.
Ukrayna lideri qeyd edib ki, bu səbəbdən sərt və qətiyyətli addımlar atmaq vacibdir. O, həmçinin Rusiya ərazisinə endirilən zərbələrə toxunaraq, Putinin müharibədə təşəbbüsü itirdiyini iddia edib.
“Putin hər ay təxminən 30 min hərbçi itirir. İtkilər böyükdür, amma o, müharibəni dayandırmaq istəmir. Buna görə də hazırda təşəbbüs Putinin əlində deyil”, – deyə Zelenski bildirib.
Prezident əlavə edib ki, Ukrayna Rusiyaya qarşı yeni sanksiyalara da ümid edir və mərhum senator Lindsey Graham tərəfindən irəli sürülmüş qanun layihəsini mühüm hesab edir.
