Dünya bir nərdivandır...
Onun dərdləri su daşından süzülən billur kimi saf idi...
Niskil, həsrət, tənhalıq bu böyük şəxsiyyətin ruhunun təntənəsinə, taleyinin yol yoldaşına çevrildi.
Nəriman Həsənzadə – dərdi poeziyaya, ömrü mənəviyyata çevirən söz ustadı...
"Dünya bir nərdivandır..." Bu fikir təkcə bir misra, yaxud poetik ifadə deyildi. Bu, böyük söz ustadı Nəriman Həsənzadənin həyata baxışının, ömür fəlsəfəsinin, insan taleyinə münasibətinin poetik düsturu idi. Həyatın pillələri ilə ağır-ağır qalxan, hər pilləsində bir ağrı, bir sevinc, bir itki, bir ümid yaşayan şair üçün dünya həqiqətən də nərdivan idi. Bu nərdivanın hər pilləsində insan öz vicdanı, əməlləri, sevgisi və sözü ilə ucalırdı.
Azərbaycan ədəbiyyatı bu gün böyük bir söz adamını itirdi. Nəriman Həsənzadə təkcə böyük şair deyildi. O, dramaturq, publisist, pedaqoq və ictimai xadim kimi milli-mənəvi dəyərlərin qorunmasına ömrünü həsr etmiş nadir ziyalılardan biri idi. Onun yaradıcılığı poeziya ilə həyatın, sənətlə həqiqətin vəhdəti idi. Yazdığı hər misrada yaşadığı ömür görünürdü, çəkdiyi ağrılar duyulurdu, sevdiyi Vətən nəfəs alırdı.
Nəriman Həsənzadənin ruhunda niskil və həsrət daim öz sözünü deyirdi. Onun dərdləri su daşından süzülən şəffaf dağ suyuna bənzəyirdi. Saf idi, təmiz idi, səmimi idi. O dərdlər insanı ümidsizliyə yox, düşünməyə aparırdı. Çünki şair ağrını heç vaxt nifrətə çevirmədi. O, ağrını poeziyaya çevirdi.
...
Bu gün onun cismani yoxluğu Azərbaycan ədəbiyyatı üçün böyük itkidir. Ancaq söz adamları ömürlərini başa vursalar da, sözləri yaşayır. Nəriman Həsənzadənin şeirləri, poemaları, dramaturji əsərləri, publisistikası və zəngin mənəvi irsi bundan sonra da yeni nəsillərin yoluna işıq salacaq.
Nəriman Həsənzadənin ömür yolu sübut etdi ki, insanın həqiqi böyüklüyü qazandığı titullarda deyil, insanların qəlbində qoyduğu izdədir. O iz sözün nuru, mənəviyyatın ucalığı və Vətən sevgisinin işığı ilə yazıldı.
Böyük şairin həyatına nəzər salanda anlayırsan ki, taleyin gətirdiyi ağır sınaqlar onu sındırmadı, əksinə, daha da kamilləşdirdi. Ata həsrəti, ana tənhalığı, ömür-gün yoldaşının itkisi onun ruhunda dərin izlər qoysa da, həmin ağrılar poeziyada ümidə, sevgiyə və mənəvi ucalığa çevrildi.
Bəlkə də buna görə onun misraları bu qədər səmimidir. Çünki onlar yaşanmamış hisslərin deyil, ömürdən keçmiş duyğuların ifadəsidir.
Nəriman Həsənzadənin sənəti Azərbaycan ədəbiyyatının qızıl səhifələrində əbədi yaşayacaq. Çünki o, sözə vicdan kimi yanaşdı, poeziyanı insan ruhunun aynasına çevirdi və ömrünün bütün pillələrini ləyaqətlə adladı.
Dünya həqiqətən də bir nərdivandır. Bu nərdivanda kimisi şöhrət üçün, kimisi sərvət üçün, kimisi isə mənəviyyat üçün yüksəlir. Nəriman Həsənzadə isə sözün işığında ucalan, ömrünü xalqına və ədəbiyyatına həsr edən sənətkar kimi həmin zirvədə özünəməxsus yerini çoxdan tutmuşdu. Bu gün o, cismani ömrünü başa vursa da, mənəvi ömrü davam edir. Onun adı Azərbaycan poeziyasının əbədiyaşar simaları sırasında yaşayacaq.
PS.
"Dünya bir nərdivandır. Qalxanda mehribandır, enəndə nə yamandır..."
Bu misralar bu gün daha fərqli səslənir. Sanki böyük şair öz ömür fəlsəfəsini illər öncə özü yazmışdı.
Sənətkarın özəlliyi də bundadır. Əsl sənətkar cismani ömrünü başa vurduqdan sonra da əbədiyyət üfüqlərində doğan Günəş kimi işıq saçır.
Ruhunuz şad olsun, əziz Nəriman müəllim!
Nə yaxşı ki, Poylu beşiyindən boy atan bir ömür Azərbaycan söz sənətinin ölməz imzasına çevrildi.
Azərbaycan Sizi heç vaxt unutmayacaq. Xatirəniz və zəngin irsiniz xalqımızın yaddaşında daim yaşayacaq.
Ustada sonsuz ehtiram və rəhmətlə.
Hürü Hacızadə
Yazıçı-publisist,
"Qızıl qələm" mükafatçısı
Fərid Faiqoğlu Səfərov
Azərbaycan Jurnalistlər Birliyinin üzvü
