Mozaika irsini gələcək nəsillərə çatdıran DƏYƏRLİ MƏNBƏ - VİDEO + FOTO
Şəhərin memarlıq mənzərəsinə xüsusi bir ab-hava qatan, öz parlaqlığı və zəngin rəng palitrası ilə uzaqdan belə göz oxşayan mozaikalar yanından ötüb keçənləri biganə qoymur. Azərbaycanda, xüsusilə sovet dövrünün arxitektura irsində geniş tətbiq olunan bu sənət nümunələri, əslində zamana meydan oxuyan monumental rəsmlərdir.
Xpress.az xəbər verir ki, bu barədə “Azərbaycan Televiziya və Radio Verilişləri” QSC-nin bazasında yaradılmış və qısa müddətdə tamaşaçı rəğbəti qazanmış “Mədəniyyət” kanalının hazırladığı süjetdə bildirilib.
Müxbir Gülarə Quliyevanın hazırladığı süjetdə qeyd olunub ki, son dərəcə davamlı materiallardan yaradılması və solmayan rəng piqmentləri sayəsində mozaikalar bu gün də öz estetik görüntüsünü qoruyub saxlayır.
Süjetdə tədqiqatçı Vahid Şükürovun, mozaika ustası Əmirxan Məmməd-Vəliyevin, keramika ustası və rəssam Məryəm Məmmədovanın fikirlərinə də yer verilib.
Həmçinin vurğulanıb ki, mozaika irsinin öyrənilməsi və qorunması istiqamətində mühüm mənbələrdən biri şərqşünas və tədqiqatçı Vahid Şükürovun müəllifi olduğu “Azərbaycan mozaikası: rənglərin simfoniyası” kitabıdır. Yeddi illik araşdırmanın nəticəsi olan bu nəşr Azərbaycanın mozaika irsini fotoşəkillər, arxiv sənədləri və tarixi məlumatlarla bir yerə toplayaraq gələcək nəsillər üçün dəyərli mənbəyə çevirib.
Daha ətraflı süjetdə:
