Ronaldu karyerası, şəxsi həyatı, sərvəti, avtomobilləri və "Mançester Yunayted" barədə danışdı
Beşqat "Qızıl top" mükafatı qalibi, portuqaliyalı hücumçu Kriştianu Ronaldu tezliklə təqaüdə çıxacağını etiraf edib.
Bu barədə jurnalist Pirs Morqana verdiyi müsahibədə deyib.
"Nə vaxt təqaüdə çıxacağım barədə bir fikrim varmı? Tezliklə. Amma düşünürəm ki, buna hazırlaşacağam. Çətin olacaq, bəli, bəlkə də ağlayacağam, bu normaldır. Bundan utanmıram. Mən açıq insanam", - deyə Ronaldu bildirib.
"Düşünürəm ki, bu təzyiqə dözə bilərəm. Mənim üçün futbolu əvəz edə biləcək bir şey varmı? Xeyr. Amma özüm, ailəm və uşaqlarım üçün daha çox vaxtım olacaq", - deyə futbolçu əlavə edib.
Ronaldunun sözlərinə görə o bu yay dünya çempionatını qazanmağı və daha sonra sevgilisi ilə evlənməyi planlaşdırır.
"Ən-Nəsr"in hücumçusu neçə avtomobilə sahib olduğunu dəqiq bilmədiyini də söyləyib. 40 yaşlı futbolçu həmçinin həyatının ən bahalı alış-verişini açıqlayıb.
"Neçə avtomobilim olduğunu dəqiq bilmirəm. Düşünürəm ki, 41-dir. Amma dəqiq bilmirəm. "Bugatti"ləri sevirəm. Onlar vəhşidirlər. Amma mən onları sürmürəm, sadəcə təmiz və yaxşı vəziyyətdə olduqlarından əmin oluram. İndiyə qədər etdiyim ən bahalı alış-veriş təyyarə olub", - deyə Ronaldu müsahibədə bildirib.
"Mançester Yunayted"in keçmiş hücumçusu komandanın hazırkı vəziyyətindən də danışıb. O, "qırmızı şeytanlar"ın bu mövsüm İngiltərə çempionluğunu qazana bilməyəcəyini deyib.
"Mançester Yunayted" bu mövsüm Premyer Liqada qalib gələ bilməyəcək. Onlar çox xal itiriblər və geridə qalırlar. "Mançester Yunayted"in çoxlu yaxşı oyunçusu var, amma onlar "Mançester Yunayted"in nə olduğunu bilmirlər", - deyə Kriş qeyd edib.
Ronaldu ilk milyarder futbolçu olmasından da danışıb.
"Bu, "Qızıl top"u qazanmaq kimi idi. Bu rəqəmə çatmaq həmişə mənim məqsədim olub. Milyarder olmaq əsas məqsədlərimdən biri idi. Mən futbolda yeganə milyarderəm. Məni təkəbbürlü adlandıra bilərsiniz, amma rəqəmlər yalan danışmır", - deyə Ronaldu bildirib.
Xatırladaq ki, oktyabr ayında "Bloomberg" Kriştianu Ronaldonu milyarder olan ilk futbolçu elan edib və onun sərvətini 1,4 milyard dollar qiymətləndirib.
