Süni intellekt bir günə diaqnoz qoyacaq
Böyük Britaniyanın Milli Səhiyyə Xidməti (NHS England) yeni pilot layihəyə start verib. Layihə çərçivəsində prostat xərçəngindən şübhələnilən kişilər diaqnozu cəmi bir gün ərzində ala biləcəklər.
Xpress.az xəbər verir ki, bu barədə Sky News məlumat yayıb.
Yeni sistem maqnit-rezonans tomoqrafiyası (MRT) nəticələrinin süni intellekt (Sİ) vasitəsilə analizinə əsaslanır və bu yanaşma diaqnostika prosesini əhəmiyyətli dərəcədə sürətləndirir.
Süni intellekt alqoritmi MRT şəkillərində şübhəli sahələri bir neçə dəqiqə ərzində aşkar edə bilir. Əgər risk yüksək qiymətləndirilirsə, məlumatlar dərhal rentgenoloqa göndərilir.
Şübhə təsdiqləndiyi halda pasiyentə elə həmin gün biopsiya təyin olunur — bu da ənənəvi üsulla müayinələr arasında yaranan bir neçə həftəlik fasiləni aradan qaldırır.
Proqram ilkin mərhələdə İngiltərədəki 15 xəstəxanada sınaqdan keçiriləcək. NHS-in qiymətləndirməsinə görə, yeni texnologiya diaqnozun qoyulma müddətini bir neçə həftədən bir günə endirə bilər ki, bu da prostat xərçənginin erkən aşkarlanması baxımından mühüm əhəmiyyət daşıyır.
Qeyd edək ki, prostat xərçəngi kişilər arasında ən çox rast gəlinən onkoloji xəstəliklərdən biridir.
Hazırda mövcud prosedura əsasən, terapevtdən göndəriş alındıqdan sonra MRT müayinəsi və nəticələrin yoxlanılması prosesi təxminən bir həftə çəkir. Lakin mütəxəssislərin çatışmazlığı səbəbindən bu müddət praktikada daha uzun olur. Həkimlərin fikrincə, süni intellektin tətbiqi həm rentgenoloqların iş yükünü azaldacaq, həm də diaqnostikanın dəqiqliyini artıracaq.
