Zərif əllər,güclü iradə... -MÜSAHİBƏ

“Ay dekor” və “Zeyhome” brendlərinin yaradıcısı ilə söhbət

– Yaradıcılıq yolunuz necə başladı?

Hələ uşaq yaşlarımdan rəsmlər çəkməyi, evdə özüm üçün dekorativ əşyalar hazırlamağı sevirdim. Hər kəs mənim əl qabiliyyətimdən danışırdı, amma heç vaxt bu hobbimi biznesə çevirməyi düşünməmişdim. Çünki mənim üçün təhsil və elm hər zaman üstünlük təşkil edib.

Ailə, uşaqlar, iş... Həyatım həmişə dolu və hərəkətli olub.
2020-ci ildə pandemiya səbəbindən onlayn rejimə keçdik və evdə keçirdiyim vaxt artdı. Həmin dövrdə yaxın bir şəxs üçün hədiyyə axtarırdım. İnternetdə araşdırma apararkən “kokulu taş” (ətirli daş) hədiyyəliklərinə rast gəldim. Mövzu marağımı çəkdi və lazımi ləvazimatları ala biləcəyim səhifələri tapdım. Artıq içimdə böyük bir istək yaranmışdı – nələrsə hazırlayaraq enerjimi sərf etmək istəyirdim.

Fikrimi evdə paylaşanda, valideynlərim hər zamankı kimi məni dəstəklədilər və ruhlandırdılar. Beləcə “Ətirli daşlar”dan qoxulu dekorlar hazırlamağa başladım.

Ən qürurverici məqam isə 44 günlük Vətən müharibəsi zamanı şəhidlik zirvəsinə ucalan qəhrəmanlarımızın ailələri üçün təmənnasız olaraq hazırladığım dekorlar idi. Həmin işləri mənəvi olaraq çox çətinliklə hazırlasam da, kiçik də olsa əməyimin keçdiyini hiss edərək qürur duydum.

– Həm müəllim, həm də biznes-ledi olmaq sizə çətin deyil ki?

Əlbəttə, çətindir. Amma mən işlərə zülm kimi yox, zəhmət kimi yanaşıram ki, nəticəsində bəhrəsi şirin olsun. Bəzən geriyə baxanda, keçdiyim yolların nə qədər çətin olduğunu anlayıram. Şükürlər olsun, Allah insana verdiyi ruhla yanaşı, hər bir işin öhdəsindən gəlmək üçün güc və qüvvət də verir.

Gündüzlər dərs, mühazirələr, övladlara vaxt ayırmaq… Buna görə də əl işləri ilə yalnız gecələr məşğul ola bilirəm. Sifarişləri səhərə qədər yatmadan hazırladığım günlər çox olub. Amma bu işə qəlbimi və sevgimi qoyduğum üçün çəkdiyim zəhmət mənə ağır gəlmir.

– Heç yorulduğunuz və dayanmaq istədiyiniz anlar olubmu?

Bəli, olub. Yuxusuz gecələr, sifarişi vaxtında çatdıra bilməmək həyəcanı, fiziki və mənəvi yorğunluq bəzən məni bu işdən uzaqlaşdırmaq istəyinə gətirib çıxarıb. Hətta bir neçə dəfə sosial şəbəkə səhifəmdə qəliblərimi satışa çıxarmışam.

Ancaq izləyicilərimdən gələn saysız-hesabsız dəstək mesajları, “Satmayın, davam edin!” kimi çağırışlar məni yenidən motivasiya edib. O dəstək mənim üçün böyük stimul oldu. Çünki o işıq mənim daxilimdədir — mən hər zaman yaratmaq və faydalı işlərlə məşğul olmaq istəmişəm.

Məhz bu istək nəticəsində “Ay dekor” hədiyyələri ilə yanaşı, “Zeyhome” adlı yeni layihəmi təqdim etdim. Bu layihə çərçivəsində müxtəlif ev aksesuarlarının tikilişi və hazırlanması ilə müştərilərimə yeniliklər təqdim edirəm.

İnanıram ki, yaxın zamanda “Zeyhome” tanınmış bir brend olacaq.