Hikmət Babaoğlu: “Media və təhsil dövlətçiliyin ideoloji dayağı olmalıdır”

“Biz milli dövlətçilik tariximizin tamamilə yeni bir mərhələsinə qədəm qoymuşuq. Bu mərhələnin başlıca paradiqmasını zəfər mərhələsi, qalib xalq təfəkkürü, döyüşkən və cəsur millət zehniyyəti təşkil etməlidir. Bu, nəticə etibarilə milli mentalitetimizin yenidən formalaşdırılması və tarixi missiyamızın dünya siyasətində qlobal miqyasda bərpası üçün olduqca vacibdir.
Ona görə də milli dövlətçilik ənənələrimizin əsas mənəvi komponentləri olan tarixi yaddaşın, milli kimliyin və mənəvi dəyərlərin yenidən bərpasına böyük ehtiyac var. Bu isə müxtəlif vasitələrlə həyata keçirilə bilər və hər şeydən öncə milli vəzifə kimi qarşımızda dayanır. Qələbəmizin dərinləşdirilməsi və onun daha geniş miqyasda təsirli olması milli gələcəyimiz baxımından zəruridir.
Mən düşünürəm ki, ilk növbədə bu istiqamətdə akademik tədqiqatlar aparılmalı, əldə olunan nəticələr isə publik dildə — dünyada yaşayan bütün azərbaycanlılara çatdırılmalıdır. Azərbaycan Milli Elmlər Akademiyasının 80 illik yubileyində Prezident İlham Əliyev əslində bu hədəfləri və metodları göstərdi. O qeyd etdi ki, Azərbaycandan kənarda da azərbaycanlılar yaşayır və onlar yaşadıqları ölkələrin ləyaqətli vətəndaşlarıdır. Lakin biz, millət olaraq, eyni mənsubiyyəti daşıyırıq. Belə olan halda, Azərbaycan dövlətinin və elminin potensialı bütövlükdə ölkəmizin etno-mədəni və tarixi coğrafiyasını əhatə etməlidir.

Bu məsələdə təhsil sisteminin də üzərinə böyük vəzifələr düşür. Çünki tədris olunan dərsliklər Prezidentin də vurğuladığı kimi, yeni metod və üsullarla — qısa broşürlər, videoçarxlar və digər innovativ vasitələrlə təqdim edilməlidir. Bu, ictimai yaddaşda daha tez mənimsənilən bir formada tariximizin, coğrafiyamızın, toponimlərimizin və dövlətçilik ənənələrimizin öyrənilməsinə xidmət edəcək. Bu isə milli məqsədlərimiz və inkişaf perspektivlərimiz baxımından son dərəcə zəruridir".

Afaq Qurbanzadə