Aqil Abbasdan İRAD: "Kanallarımız daha çox dava-dalaş xarakterli verilişlər yayımlayır” -MÜSAHİBƏ
Azərbaycan mədəniyyəti son illərdə həm ölkə daxilində, həm də xaricdə uğurla təbliğ olunur. İşğaldan azad olunmuş ərazilərdə keçirilən tədbirlər, muğam sənətinin qorunması və gənclər üçün yaradılan şərait bu sahədə atılan əhəmiyyətli addımlardır. Yazıçı, deputat Aqil Abbasla söhbətimizdə mədəniyyətin inkişafı, televiziya proqramlarının durumu və sosial şəbəkələrdəki çağırışlar barədə danışdıq.
– Aqil müəllim,İşğaldan azad olunmuş ərazilərdə mədəniyyət sahəsində hansı tədbirlər keçirilir?
-Orada müxtəlif tədbirlər və sammitlər təşkil olunur. Xüsusilə muğam sənəti uzun müddət tənəzzül yaşamışdı, lakin Heydər Əliyev Fondunun dəstəyi sayəsində muğam öz yerini qoruyub. Gənclər üçün yaradıcılıq sahəsində şərait yaradılıb və bu istiqamətdə böyük işlər görülür.
–Bəs Televiziya sahəsində vəziyyət necədir?
-Bəzi tədbirlər reytinq qazanmır, amma diqqətə layiqdir. Təəssüf ki, televiziya kanalları daha çox dava-dalaş xarakterli verilişlər yayımlayır. Bu, qurumların fəaliyyətini davam etdirməsi və tamaşaçı cəlb etmək ehtiyacı ilə bağlıdır.
– Mədəniyyət sahəsində görülən işlər barədə nə deyə bilərsiniz?
Mədəniyyət sahəsində işlər davam edir. Laçında xalçaçılıqdan tutmuş müxtəlif yaradıcılıq sahələrinə qədər tədbirlər keçirilir, filmlər çəkilir və Azərbaycan mədəniyyəti dünyanın müxtəlif yerlərində təbliğ olunur. Zəfər Günü ilə bağlı tədbirlər də bunun bariz nümunəsidir.
– Sosial şəbəkələrdə mədəniyyətlə bağlı yayılan materiallar barədə fikriniz nədir?
Sosial şəbəkələrdə bəzi şəxslər Azərbaycan mədəniyyətini düzgün təqdim etmirlər, bəzən isə qeyri-etik məzmun paylaşılıb. Demokratik ölkə olduğumuz üçün sosial şəbəkələri bağlamaq mümkün deyil. Senzura tətbiq etmək olmaz, bəzi cəzalar mümkündür, amma ümumilikdə problemi tam aradan qaldırmaq mümkün deyil.
Afaq Qurbanzadə
