Öz körpələri ilə yanaşı heyvan balalarını da əmizdirən XALQ
Hindistanın Racastan ştatında yaşayan Bişnoy icması əsrlərdir təbiətin qorunmasını həyat tərzinə çevirən nadir xalqlardan biri kimi tanınır. Sosial şəbəkələrdə geniş yayılan, bir qadının öz körpəsi ilə yanaşı maral balasını da əmizdirdiyi foto Bişnoyların təbiətə və canlılara münasibətinin simvolu hesab olunur.
Bişnoy kəndlərində vəhşi heyvanların insanların arasında sərbəst dolaşması adi haldır. Bu icmada heyvanlar qorunur və onlara zərər vermək ağır günah sayılır. Məlumata görə, dövlət rəsmiləri və digər yad şəxslər Bişnoy kəndlərinə səfər etməzdən əvvəl ehtiyatlı olmağa çağırılır, çünki yerli əhali ovçu ola biləcək insanlara qarşı son dərəcə həssasdır.
Səhranın ortasında yaşayan Bişnoylar su qıtlığına baxmayaraq, əsrlərdir yağış sularının toplanması ilə məşğuldur. Toplanan su yalnız insanlar üçün deyil, bütün canlıların istifadəsinə açıqdır. Onlar canlı ağacların kəsilməsini qəti şəkildə qadağan edir, yalnız qurumuş və ya təbii fəlakət nəticəsində aşmış ağaclardan yanacaq və məişət məqsədləri üçün istifadə edirlər.
Tarixi mənbələrə görə, təxminən 300 il əvvəl bölgə hökmdarının yeni saray tikintisi üçün ağacların kəsilməsi barədə verdiyi əmrə qarşı Bişnoy qadınları ağaclara sarılaraq etiraz ediblər. Nəticədə 363 Bişnoy həyatını itirib. Bu hadisə sonradan təbiətin qorunması uğrunda edilən ən böyük fədakarlıqlardan biri kimi tarixə düşüb. Bişnoy inancına görə, digər canlıları qorumaq naminə canını qurban vermək ən uca şəhidlik sayılır.
Dini icma olmalarına baxmayaraq, Bişnoylar mürəkkəb ayinlərə deyil, mərhəmət, sevgi və sülh prinsiplərinə üstünlük verirlər. Onlar odun israfına səbəb olduğu üçün hindu ənənəsində geniş yayılmış ölü yandırma mərasimindən imtina edərək, ölülərini torpağa dəfn etməyə başlayıblar.
Təbiətlə harmoniya içində yaşayan, insan və heyvan arasında sərhəd qoymayan Bişnoy xalqı bu gün də ekoloji düşüncənin canlı nümunəsi kimi diqqət çəkir.
Xpress.az
