Evdən çıxarkən fişdə saxlanmamalı olan 6 cihaz açıqlanıb

Evdən çıxarkən prizdə saxlanmamalı olan 6 cihaz açıqlanıb
Evdən çıxarkən prizdə buraxılan bəzi cihazlar təkcə lazımsız enerji sərfiyyatına səbəb olmur, eyni zamanda elektrik təhlükəsizliyi baxımından da risk yaradır. Elektrik ustaları və enerji səmərəliliyi üzrə mütəxəssislər xüsusilə evdə uzun müddət olmayacağınız hallarda bəzi cihazların mütləq prizdən çıxarılmasını tövsiyə edir. Çünki söndürülmüş kimi görünən bir çox cihaz prizdə qaldıqda enerji sərf etməyə davam edir və gözlənilməz nasazlıqlara yol aça bilər.

Mütəxəssislərə görə risk cihazın bahalı və ya kiçik olmasından deyil, onun işləmə prinsipi və daxili elektrik sxemi ilə bağlıdır. Budur evdən çıxarkən prizdə buraxılmaması tövsiyə olunan və ən çox diqqətdən yayınan cihazlar:

Elektrikli su qızdırıcısı (kettle)

Su qızdırıcıları qısa müddətdə yüksək cərəyan çəkən cihazlardandır. İçində su olmasa belə, prizdə qaldıqda rezistor və elektron kart daim gərginlik altında qalır. Elektrikçilər xüsusilə köhnə və ya əhəng bağlamış kettle-ların prizdə unudulmasının həddindən artıq isinmə və sıradan çıxma riskini artırdığını bildirir.

Ütü

Ütü ev qəzaları ilə bağlı ilk ağla gələn cihazlardandır. Söndürülmüş vəziyyətdə olsa belə, prizdə qalan ütülərdə termostat nasazlığı riski mövcuddur. Mütəxəssislərə görə evdən çıxarkən ütünü sadəcə söndürmək kifayət deyil, mütləq prizdən çıxarmaq lazımdır.

Televizor və peyk qəbuledicisi

Televizor söndürüləndə tamamilə sönmüş sayılmır, gözləmə rejimində enerji sərf etməyə davam edir. Bundan əlavə, ani gərginlik dəyişmələri televizor və peyk qəbuledicilərinin elektron hissələrinə zərər verə bilər. Prizdən çıxarmaq həm elektrik haqqına, həm də cihazın ömrünə müsbət təsir göstərir.

Şarj adapterləri

Telefon və planşet adapterləri cihaza qoşulu olmasa belə, prizdə qaldıqda enerji çəkməyə davam edir. Elektrik mühəndislərinə görə bu “gizli enerji sərfiyyatı” il sonunda hesab-fakturaya ciddi təsir göstərə bilər. Aşağı keyfiyyətli adapterlər isə uzun müddət prizdə qaldıqda isinmə riski yaradır.

Mikrodalğalı soba

Mikrodalğalı sobalar saat və ekran göstəricilərinə görə prizdəykən davamlı enerji sərf edir. Eyni zamanda elektron kartlar elektrik kəsintilərindən və gərginlik dalğalanmalarından zərər görə bilər. Bu səbəbdən istifadə edilmədikdə prizdən çıxarılması tövsiyə olunur.

Qəhvə maşını

Xüsusilə avtomatik və kapsullu qəhvə maşınları prizdəykən gözləmə rejimində qalır. Su çəni və qızdırıcı sistemləri səbəbilə elektrik ustaları bu cihazların evdən çıxarkən prizdə buraxılmamasını məsləhət görür.

Niyə bu qədər vacibdir?

Mütəxəssislərə görə prizdə buraxılan cihazlar üç əsas risk yaradır:

• Lazımsız elektrik sərfiyyatı

• Elektrik dalğalanmalarına bağlı nasazlıqlar

• Nadir hallarda da olsa yanğın riski

Xüsusilə yay aylarında və evdə uzun müddət olmayacağınız zamanlarda bu risklərin daha da artdığı qeyd olunur.

Evdən çıxarkən fişi çəkmək kiçik bir vərdiş kimi görünsə də, həm təhlükəsizlik, həm də enerji qənaəti baxımından böyük fərq yaradır. Mütəxəssislər tez-tez istifadə olunan prizlər üçün açarlı uzadıcı kabellərdən istifadə etməyi və evdən çıxmazdan əvvəl qısa bir “priz yoxlaması” aparmağı tövsiyə edir.