Tanınmış vəkil: Heç bir şəxs vəkilə vəkillik fəaliyyəti ilə bağlı təzyiq göstərə bilməz - VİDEO
“YouTube” platformasında yayımlanan “Kazusmedia” hüquq layihəsinin növbəti buraxılışı tamaşaçıların ixtiyarına təqdim olunub.
Layihə bu dəfə də hüquq ictimaiyyətinin diqqətini cəlb edən mövzulara həsr olunub və geniş maraq doğurub.
Budəfəki qonaq Vəkillər Kollegiyası Rəyasət Heyətinin üzvü, Bakı şəhəri 4 saylı Vəkil Bürosunun müdiri Ramiz İbrahimov olub. O, müsahibəsi zamanı hüquqi fəaliyyətində qarşılaşdığı yaddaqalan hadisələrdən, peşə həyatında üzləşdiyi çətinliklərdən, həmçinin vəkillik peşəsinin cəmiyyət üçün daşıdığı vacib rol və əhəmiyyətli missiyadan danışıb.
Veriliş boyu qonağa hüquq sahəsi ilə bağlı aktual məsələlər, vəkil peşəsinin əsas prinsipləri, insanları müdafiə etməyin çətinlikləri, hakimlərlə münasibətlər, peşəkar təcrübə və cəmiyyət qarşısında vəkillərin rolu kimi mövzular əhatəli şəkildə təqdim olunub.
Eyni zamanda Ramiz İbrahimov peşəkar vəkil necə olmalıdır, vəkillik peşəsinin özəlliyi nədir, insanları müdafiə etmək çətin iş hesab oluna bilərmi, vəkil davranışında nəyə önəm verməlidir, peşəkar vəkil üçün əxlaq önəmlidirmi, vəkilliyin inkişafı sizi qane edirmi, vəkilin öz biliyini mütəmadi olaraq artırması zəruridirmi, vəkil-hakim münasibətləri necə qurulmalıdır suallarını cavablandırıb, habelə gənc vəkillərə tövsiyələr edib.
“Vəkil davranışında həmişə səbirli və təmkinli olmalıdır. Buna ən çox önəm verirəm. Eyni zamanda vəkil davranışında müstəqil olmalıdır. Müqavilə bağladığı şəxsdən başqa heç kəs vəkilə göstəriş və təzyiq edə bilməz. Bu bizim qanunumuzda da qeyd edilib”, - deyə vəkil bildirib.
