Rus ixtiraçıdan təhlükəsiz tibbi yenilik: Özünü məhv edən şpris

Rusiyada xəstələrin təhlükəsizliyini artırmağa yönəlmiş yeni növ şpris icad edilib. Federal Əqli Mülkiyyət Xidməti bu birdəfəlik şprislə bağlı patent təqdim edib. İxtiranın müəllifi Vladikavkazlı ixtiraçı Anna Kononovadır. Onun sözlərinə görə, yeni mexanizm müxtəlif xəstəliklərin insanlar arasında yayılması riskini azaltmağa kömək edəcək.
Yeni şprislərin əsas xüsusiyyəti ondan ibarətdir ki, istifadə edildikdən sonra onlar avtomatik şəkildə yararsız hala düşür və ikinci dəfə istifadə edilə bilmir.
İxtiranın məqsədi dərmanların insan orqanizminə yeridilməsi üçün nəzərdə tutulan vasitənin yalnız bir dəfə istifadəsini təmin etməkdir. İlk istifadədən sonra şpris mexanizmi sıradan çıxır və onun yenidən işlədilməsi mümkün olmur.
Bu sistemin əsas fərqi iki hissədən ibarət xüsusi porşen mexanizmidir. Dərmanın vurulması üçün nəzərdə tutulmuş porşenin daxilində əlavə klapanlı hissə yerləşir. Dərman şprisə çəkildikdən və inyeksiya həyata keçirildikdən sonra porşen artıq əvvəlki vəziyyətinə qaytarıla bilmir. Porşendə yerləşən xüsusi kəsik mexanizmin qırılmasına səbəb olur və nəticədə şpris tamamilə istifadəyə yararsız vəziyyətə düşür.
Mütəxəssislərin fikrincə, bu cür şprislər xüsusilə eyni iynədən dəfələrlə istifadə edən insanlar üçün faydalı ola bilər. Təkrar istifadənin qarşısının alınması QİÇS, hepatit və digər yoluxucu xəstəliklərin yayılma riskini əhəmiyyətli dərəcədə azalda bilər.

Xpress.az