“Xəzərin sahilindən…” - EKRANDAN KITABA - FOTO
Ölkənin müxtəlif telekanallarında yayımlanan “Xəzərin sahilindən…” verilişinin 10 yaşı tamam olur. Milli mətbuatın yaranmasının 151-ci ildönümü ərəfəsində telesilsilənin materialları kitab şəklində işıq üzü görüb.
Layihənin rəhbəri və aparıcısı sənətşünaslıq üzrə fəlsəfə doktoru Fəxriyyə Lilpar olan populyar verilişin 10 illik fəaliyyətini əks etdirən nəşrin təqdimat mərasimində bu il ölkəmizin ilk televiziyasının yaranmasının 70 illiyi, radiosunun isə 100 illik fəaliyyəti də diqqət mərkəzində olub. Verilişin qəhrəmanları olmuş ictimai-siyasi xadimlərin, tanınmış ziyalıların, media nümayəndələrinin iştirak etdikləri məclisdə qeyd olunub ki, tarixi ənənəyə söykənən bu milli-mənəvi dəyər müasir televiziyaların da yaradıcılığına öz təsirini göstərir.
ADPU-nun prorektoru, filologiya elmləri doktoru, professor Mahirə Nağıqızı, Milli Məclisin üzvü Jalə Əliyeva, Milli Məclisin İctimai birliklər və dini qurumlar komitəsinin eksperti Əkbər Qoşalı, Əməkdar jurnalist, professor Qulu Məhərrəmli, Əməkdar incəsənət xadimi Baba Vəziroğlu, “Sağlamlığın Qorunması” İB-nin sədri, tibb elmləri doktoru Yazgül Abdiyeva, Əməkdar jurnalist, professor Etibar Babayev, Əməkdar incəsənət xadimi Fəxriyyə Xələfova, filologiya üzrə fəlsəfə doktoru Şərəf Cəlilli və digər çıxış edənlər verilişin 10 il ərzində tamaşaçı rəğbəti qazandığını, cəmiyyət üçün maraqlı mövzulara toxunduğunu və peşəkar televiziya layihəsi kimi özünəməxsus yer tutduğunu bildiriblər.
Kitabın diqqətçəkən özəlliklərindən biri də onun interaktiv formatda hazırlanmasıdır. Hər bir müsahibənin önündə xüsusi QR kod yerləşdirilib. Oxucu həmin kod vasitəsilə birbaşa “YouTube” platformuna keçərək müsahibənin televiziya versiyasını izləyə bilir. Beləliklə, kitab həm oxu materialı, həm də audiovizual yaddaşla canlı bağlantı yaradan çağdaş informasiya resursuna çevrilir.
Mütəxəssislərin fikrincə, bu yanaşma Azərbaycanda çap məhsullarının rəqəmsal imkanlarla zənginləşdirilməsi yönündə uğurlu örnəklərdən biridir və kitabı klassik nəşr çərçivəsindən çıxararaq çoxformatlı mədəni layihə səviyyəsinə yüksəldir.
Sonda layihənin və kitabın müəllifi Fəxriyyə Lilpar toplunu imza ilə iştirakçılara hədiyyə edib.
