Avqustun 1-dən bu sürücülərə yanacaq verilməyəcək

Avqustun 1-dən etibarən Rusiyadakı yanacaqdoldurma məntəqələrində təhlükəsizlik qaydalarına nəzarət daha da gücləndiriləcək. Yeni tələblərə əsasən, təhlükə yaradan vəziyyətlərdə sürücülərə yanacaq satılmasından imtina ediləcək.

Qaydalar əsasən texniki nasazlığı olan avtomobillərə şamil olunacaq. Belə ki, yanacaq çənindən benzin və ya dizel sızan, yanacaq sistemində nasazlıq olan və ya qaz avadanlığında sızma əlamətləri müşahidə edilən nəqliyyat vasitələrinə xidmət göstərilməyəcək.

Bundan əlavə, elektrik naqillərində güclü qığılcım yaranması və ya avtomobilin yaxınlığında açıq alovun olması da yanacaq doldurulmasına icazə verilməməsi üçün əsas sayılacaq.

Yeni qaydalara əsasən, sürücülər aşağıdakı hallarda da yanacaq ala bilməyəcəklər:

Yanacağın standartlara uyğun olmayan plastik qablara doldurulmasına cəhd etdikdə;
Yanacaqdoldurma məntəqəsinin ərazisində siqaret çəkdikdə;
Yanacaq nasosunun yaxınlığında təhlükəsizlik qaydalarını pozduqda;
Mühərrik işlək vəziyyətdə olarkən avtomobilə yanacaq doldurmağa cəhd etdikdə.

Məhdudiyyətlərin məqsədi yanğın və partlayış riskini minimuma endirmək, həm sürücülərin, həm də yanacaqdoldurma məntəqələrinin əməkdaşlarının təhlükəsizliyini təmin etməkdir. Mütəxəssislər bildirirlər ki, mümkün qəza və ya yanğının vuracağı zərər bir neçə litr yanacağın satışından əldə ediləcək gəlirdən qat-qat böyükdür.

 Xpress.az