“Baku” jurnalında Palçıq Vulkanları Turizm Kompleksi barədə məqalə dərc olunub - FOTO

“Baku” jurnalının 2026-cı il iyul-avqust sayında Azərbaycanın palçıq vulkanlarına həsr olunmuş məqalə dərc olunub.

Xpress.az Qoruqları İdarəetmə Mərkəzinə istinadla xəbər verir ki, Natalya Babinçevanın hazırladığı məqalədə unikal və qeyri-adi geoloji təbiət hadisəsindən geniş bəhs edilib.

Qeyd olunub ki, Yer kürəsində məlum olan 2 mindən artıq palçıq vulkanının 350-dən çoxu Azərbaycanın şərqində və Xəzər akvatoriyasında yerləşir. Palçıq vulkanları əsasən Abşeron yarımadası, Bakı ətrafındakı adalar qrupu, Şamaxı, Qobustan və cənub-şərqi Şirvanda yayılıb.

Məqalədə Dövlət Turizm Agentliyinin Qoruqları İdarəetmə Mərkəzinin sektor müdiri, şərqşünas və jurnalist Vahid Şükürovun fikirlərinə də yer verilib. Palçıq vulkanlarının spesifik xüsusiyyətləri barədə məlumat oxuculara çatdırılıb.

Müəllif N.Babinçeva Qobustan ərazisindəki Palçıq Vulkanları Turizm Kompleksinin fəaliyyətinə də toxunub. Bildirilib ki, 2024-cü ildə açılışı olan bu müasir turizm kompleksində “Qılınc” palçıq vulkanını yaxından izləmək mümkündür.

Bununla yanaşı, Kompleksin “Təbiət tarixi” sərgi zalı və “Minerallar sərgisi”nin də ziyarətçilərdə böyük maraq oyatdığı diqqətə çatdırılıb.