Bağışlanan ev satıla bilər? — Açıqlama
Daşınmaz əmlakın bağışlanması bir çox hallarda ailə münasibətləri, yaxınlara dəstək və ya əmlakın gələcək taleyinin müəyyənləşdirilməsi məqsədi ilə həyata keçirilir. Lakin əmlak başqa şəxsin adına keçirildikdən sonra tərəflər arasında hüquq və öhdəliklərin necə dəyişməsi, əvvəlki sahibin həmin əmlak üzərində hər hansı nəzarət imkanının qalıb-qalmaması tez-tez sual doğuran məsələlərdəndir.
Xüsusilə valideynlərin övladlarına, ailə üzvlərinin və ya digər şəxslərin bir-birinə daşınmaz əmlak bağışlaması zamanı həmin əmlakın gələcəkdə satılmaması, başqa şəxslərə verilməməsi və ya ailə daxilində qalması ilə bağlı müəyyən istəklər olur. Ancaq mülkiyyət hüququnun tam şəkildə başqa şəxsə keçməsi ilə yeni sahibin əmlak üzərində sərəncam vermək hüququ yaranır.
Bu baxımdan bağışlama müqaviləsi zamanı tərəflərin hansı şərtləri müəyyən edə bilməsi, yeni mülkiyyətçinin əmlakı gələcəkdə satmaq və ya özgəninkiləşdirmək hüququnun məhdudlaşdırılıb-məhdudlaşdırıla bilməməsi hüquqi baxımdan mühüm əhəmiyyət daşıyır. Bəs Azərbaycan qanunvericiliyi bu məsələdə hansı imkanları nəzərdə tutur? Bağışlayan şəxs əmlakın gələcək taleyinə təsir edə bilərmi?
Demokrat.az-a mövzu ilə bağlı danışan hüquqşünas Elnur Məmmədov deyib ki, Azərbaycan Respublikasının mülki qanunvericiliyinə əsasən, daşınmaz əmlak bağışlama müqaviləsi əsasında başqa şəxsin mülkiyyətinə keçirildikdən sonra həmin şəxs əmlak üzərində tam mülkiyyət hüququ əldə edir.
“Mülkiyyət hüququnun məzmununa sahiblik, istifadə və sərəncam vermək səlahiyyətləri daxildir. Buna görə də, bir qayda olaraq, yeni mülkiyyətçinin əmlakı satması, bağışlaması, dəyişməsi, ipoteka ilə yükləməsi və ya digər formada özgəninkiləşdirməsi onun qanunla qorunan mülkiyyət hüququnun tərkib hissəsidir.
Bu səbəbdən, bağışlama müqaviləsində "əmlak heç vaxt satıla, bağışlana və ya başqa şəxsə verilə bilməz" məzmununda daimi və mütləq qadağanın nəzərdə tutulması Azərbaycan mülki hüququnun əsas prinsipləri ilə uzlaşmır. Belə şərt mülkiyyət hüququnun mahiyyətini məhdudlaşdırdığı üçün hüquqi qüvvəyə malik hesab edilməyə və ya məhkəmə tərəfindən etibarsız sayıla bilər”, - deyə Elnur Məmmədov fikrini tamamlayıb.
