“Təbiətin gücünü gözündə kiçiltməklə qurbana çevrilə bilərsən” - Samirə Bağırova
“İnsanlar bəzən təhlükəni yanlış qiymətləndirirlər. Güclü külək, daşqın, sel, zəlzələ kimi təbiət hadisələri böyük təhlükə mənbəyi hesab olunur. Bu səbəbdən insan beyni ona tanış və təhlükəsiz görünən mühitdə təhlükəni görə bilmir. Dənizin sakit görünməsi onun təhlükəsiz olduğu anlamına gəlmir, amma insanlar çox vaxt vizual təəssürata aldanırlar”.
Bu sözləri Xpress.az-a psixoloq Samirə Bağırova danışıb.
O, açıqlamasında qeyd edib ki, xüsusilə gənclər və fiziki cəhətdən özünə güvənən insanlar “Mən yaxşı üzürəm” düşüncəsi ilə real təhlükəni nəzərə almırlar:
“Bəzən insan daxilən qorxu hiss etsə də, sosial təsirin altında və ya kiməsə özünü sübut etmək istəyi ilə uzağa üzmək kimi təhlükəli qərarlar verir və nəticədə qurbana çevrilir. Həmçinin emosional vəziyyətdə qəbul edilən qərarlar da yanlış ola bilər.
İstirahət, həyəcan, adrenalin axtarışı və ya gündəlik stressdən uzaqlaşmaq istəyi təhlükəni düzgün qiymətləndirmə qabiliyyətini zəiflədə bilər. İnsan anlamalıdır ki, təbiətin gücünü kiçik görmək onu faciə ilə üz-üzə qoya bilər”.
Aysel İbrahimli
